VC-ten hna kan thawh chak a ngai – LAD minister

On Nov 27, 2024 22 0

VC-ten hna kan thawh chak a ngai
– LAD minister
Sawrkar laipui atanga sum lokal zel tur hmuh thuai thuai a nih theihnan village council-ten hna an thawh chak a ngai tih Local Administration minister C Lalsawivunga chuan a sawi.
Thawhlehnia Aizawla All Mizoram Village Council Association (AMVCA) general conference neih a hmanpuinaah LAD minister hian sawrkar laipui atanga Finance Commission Grant hmuh dan a sawi a. Hun rei tak utilization certificate thehluh loh leh thil fel lo dang hrang hrang awm chu chinfel a nih dan sawiin, 2022-2023 second installment pawh pekchhuah nghal a nih tur thu a sawi.
Hetihrual hian VC member-ten hna an thawh danah leh sum an hman danah muangchang thei an ni lo, tiin, state dangah chuan 2024- 2025 second installment an buaipui mek tih a sawi a. FC grant hman dan hi portal-ah upload vek a ni a, hna thawh zawh hnu in sawrkar laipuiin geo tagging hmangin a hnathawh chin a vil reng a, sum hman dan chu a langtlang tih a sawi a ni.
“Sum hi account-a a lo luh atangin muangchang loa thawh thuai thuai tur a ni a, kan hman chak loh leh hman muan em avangte, hna kan thawh chak loh avangte in FC grant a dawt leha kan hmuh tur kan hmuh tlai phah thin a ni,” C Lalsawivunga hian a ti.
Hemi kaihhnawihah hian Rashtriya Gram Swaraj Abhiyan (RGSA) hnuaiah Panchayat Bhavan sak hna VC thenkhata thawh mek pawh hmanhmawh turin minister hian a chah a. Second installment thun turin office lam an inpeih thlap tawh tih a sawi. Tuna hna kal mek bak chu Panchayat Bhavan tam zawk sak belhna tur sawrkar laipui chuan a ruahman tih a sawi bawk. VC-te bank-ah zero balance account hawng tura tih, la hawng lote chu hawng thuai turin a chah.
LAD minister hian VC innghahna Lushai Hills District (Village Councils) Act 1953 chu a hunlai chuan dan tha tak ni mah se, hun kalzelah ram leh khawtlang danglam leh hnathawh dan mil tur inkaihhruaina thar siam a hun ta tih a sawi a. He Act thlakna tur hi Drafting Committee-in uluk taka buatsaihin, mithiamte nen vawi tam an inrawnkhawm a, Law & Judicial department endik turin a awm mek tih a sawi a ni.