Chile ram pumah power supply awm lo

Chile ram pumah power supply awm lo
Chile ram pum deuh thawah hun eng emaw chen electric a awm lo va, chanchinbute erawh chuan Thawhlehni zan khan an khawpui, Santiago hmun Thenkhatah chuan a awm leh tawh tih an tar lang.
Power awm lo avang hian emergency puan niin hmun thenkhatah curfew a ni a, sipaite pawh tirh an ni.
Latin America-a rimawh kûtpui lian ber, Viña del Mar pawh a ni thumna bik chu power awm lo vang hian thulh a ni.
Damdawi in leh tan inte chuan generator an hmang a, inkalpawhna hmanruate pawh a nghawng nasa hle a. Sorkar chuan a pek chhuahna pui berah buaina a awm vang niin a sawi.
TV-a thuchah a sawiah President Gabriel Boric chuan chhungkaw maktaduai riatin an tawrh thu a sawi a, a zahve vel erawh chuan power an hmu leh tawh tih a sawi.
“Vawiina thil thleng hi a pawi khawp mai,” a ti a. “Company pahnih khat emaw lekin an tuar lo va, Chilean maktaduai telin an tuar a, sorkar chuan a mawh a nih angin hma a la mek zel a ni,” a ti.
National service for disaster prevention & response chuan a hmain power awm lo hi hmar lama Arica leh Parinacota region aTangin chhim lama Los Lagos thleng a nih thu a puang.
Reuters news agency chuan khawvela darsen laih chhuahna hmun lian ber, Escondida pawhin power an nei lo niin a tar lang.
Latam Airlines chuan an thlawhna eng emaw zat a nghawng tih sawin power supply awm lo chungin passenger-te chu an chuanna tur thlawhna chet vel dan tur puan ngaichang ngun tura ngen an ni tih a sawi.
Santiago Metro operator pawhin an service chu power an khaihlak avangin an ding rih tih a sawi a, station-te pawh ruakin khar a ni tih X-ah a tar lang.
Khawpuia thlalak thehdarhah chuan passenger-te chu power awm loh avanga escalator che thei lovah kein an kal a, traffic signal pek chhuah pawh a buai vek bawk a ni.
Kawngpuia tlan bus-te erawh a lun hle thung.
Kum 45 mi, Maria Angelica Roman-i chuan, “Power a awm loh avangin hnathawhna hmun atangin min hawtir a; mahse, bus a khah vek avangin haw ngaihna pawh a awm chuang lo,” tiin AFP news agency hnenah a sawi.
Interior Minister Carolina Toha chuan power awm lo awmtir leh tur hian thutkhawm koh niin a thlen nawn tawh lohna turin hma lak a ni dawn tih X-ah a tar lang.