Myanmar-a Chin State-a an chief minister chu Lian Luai a ni a, sipaiin sorkarna an hnehchhuh avangin chief minister meuh mah ni se Mizoramah a raltlan mek. Mizoramin a lo dawnsawn danah a lawm a, sorkar leh mipui chunga an lawmzia hi an sawi thiam lo zawk ti hialin a sawi.
February ni 21 zanah khan Myanmar atanga Mizoram raltlan leh a lo awm sate’n Vanapa Hall-ah Chin State-a an ni pawimawh Chin National Day an hmang a, he hunah hian thu sawiin Lian Luai chuan, “Mizoram sorkar leh mipui hnenah lo hi chuan tlukluhna leh pangchanna tur kan nei lo a ni,” a ti.
“Raltlante chunga Mizoram sorkar leh NGO hrang hrang te, kohhran leh khawtlang mipui, nasa takin min lo buaipui a, min lo enkawl dan zozai hi kan lawm tak zet a,” a ti a, lawmthu pawh an sawi thiam lo zawk tiin a sawi.
“Hetiang hian min tuamhlawm lo ula chu, kan hmakhua hi ngaihtuah theih pawh a ni lo,” a ti.
Chutih rual chuan thupha pawh a chawi a, Myanmar atanga Mizorama lutte zinga mi thenkhat awm dan chu pawi a tih thu sawiin, “Tu tute emaw, thil tha lo rawn tia rawn lalutte hi an awm thin a. He thil hi keini pawhin kan duh loh, kan huat tawp thil a ni a,” a ti a, “MP rualte leh mipui sipaite’n nasa takin kan khap a ni,” a ti.
Myanmar sipaite hi mipui sipaite nen an inbei mek tih a sawi a, engtia rei nge hei hian a awh dawn tih hriat ni lo mah se mipui sipaite’n an hneh ngei an rin thu sawiin, chumi hunah chuan Myanmar-ah democracy sorkar a ding ang tih a sawi a, chumi hunah chuan hmun danga Zo hnahthlakte nen nasa zawkin rawng an bawlho thei ang tiin a sawi.
“Min ning phal lova min khawngaih zel turin, min tanpui zel turin ka rawn sawm che u a ni,” tiin Lian Luai chuan Mizoram a sawm.
Hemi zana an khuallian chu Mizoram chief minister Zoramthanga a ni a, Lian Luai nen hian an thu dun a ni.
Chin State CM-in Mizoram chungah lawmthu sawi
Get real time updates directly on you device, subscribe now.