Taiwan chuan United States nen military lamah nasa zawkin an thawkho dawn a, an zawlpui ram dangte nen pawh ‘authoritarian expansionism’ (China sawina) dodal turin an thawkho tha zual zel dawn tiin President Tsai Ing-wen chuan a US lawmaker Taiwan tlawhtute hnenah a sawi.
United States hian ram dan ang bawkin official-in diplomatic lamah Taiwan nena inzawmna a nei lo va, a chhan chu China-in a remtih loh vang niin Taiwan hi a ram anga a chhal leh mainland China nena nakina la inzawm tura a ngaih a ni. Mahse, Taiwan chuan mahni inrelbawl ram angin a inngai thung.
United States hian Taiwan-ah military base pawh a nei tawh lo va, mahse, ram pahnihte chu an inlaichinna tha em em zelin China in Taiwan chu Chinese sovereignty pawm luihtir a tumnaah pawh US nen an dodal dun zel a ni.
“Taiwan leh United States te chuan military exchange an kalpui chhunzawm zel ang a, Taiwan chu United States mai bakah democratic partner dang te nen global challenge hmachhawn tur awm zelah leh authoritarian ram inlaklen tum zel karah nasa zawkin an thawkho zel ang,” tiin Tsai chuan a sawi.
United States nena military lama an thawhdunna chungchangah U.S. Deputy Assistant Secretary of Defense for China Michael Chase pawhin tun hnaiah Taiwan hi tlawhin kawng hrang hranga thawhhona tur an sawi chhunzawm zel dawna sawi a ni bawk.
Ro Khanna, member of the U.S. House China Select Committee, US bipartisan delegation aiawh pawhin Tsai hnenah security leh economic lama thawhhona tichak tura Taiwan tlawh an nih thu a sawi bawk a.
“Economic lama inzawmna tichak tura lokal kan ni a. Sicilon Valley aiawh k ania Dr Morring Chang nena inhmuhna kan nei thei hi ka lawm a ni” tiin a sawi a Morris Chang hi Taiwan Semiconductor Manufacturing Co Ltd dintu niin khawvela chipmaker lian ber an ni bawk.
“Technology lama economic partnership tha zawk kan neih theih zelna tur leh military leh defence lama kan thawhho zel dan tur kan ngaihtuah a ni,” tiin Khanna chuan a sawi.
Nikum August thla khan US House Speaker Nancy Pelosi chuan Taipei a tlawh a, hei hi China chuan helh ngang ngang hlein Nancy Pelosi awm lai ngeiin military exercise a kalpui zui nghal a ni.
Taiwan hian democratic taka thlan sorkar a nei a, Taiwan sorkar chuan China-in an ram anga a chhal chu a hnawl bur bawk a, Taiwanese ten an hma lam hun chu an tihchian tur a ni a ti ve tlat thung.
Taiwan-in US nena thawhhona chak zawk duh
Get real time updates directly on you device, subscribe now.