Kum 60 hnuah China population chu a tum khat nan a tlahniam a, naupiang chu hmeichhia 1,000 zelah 6.77-ah a tlahniam.
Tihian China population chu kum 2022 khan tluklehdingawn 1.4118 niin kum 2021 aiin 850,000-in a tlem zawk a ni.
-- Advertisement --
China-a naupiang hi a kum telin an tlahniam char char tawh a, hei vang hian thuneitute chuan hlauhthawnna neiin naupiang tihpun tumin hma an la nasa zui hle.
Kum 2022 khan naupiang kiamna chu 7.52 niin China National Bureau of Statistics chuan a tarlang bawk.
A tum khat nan naupiang aiin thi an tam bawk a. Kum 1976 hnua China-a kum khat chhunga nunna chan tam ber tum thlengin mi 1,000 zelah nunna chan 7.37 an awm a, a hma kum khan 7.18 a ni thung.
A hma pawhin China sorkar chuan demographic crisis an tawn mek thu sawiin hun a rei chuan China labour force tlahniam dawnin healthcare phurrit a siam an, social security cost a sang dawn an ti bawk.
Kum 2021-a kum sawm dana census neihah China population chuan a than muan ber a tawng mek tih a ni tawh bawk a.
Kum upa pung zel leh naupiang tlem zel bawk si chu Asia a ram changkang heng South Korea leh Japan te pawh a nghawng bawk a ni.
Tun hnaia China population tlakhniam chhan hi kum 1979 a population growth tihmuan nana one-child policy an kalpui nghawng zel nia ngaih a ni.
Chhungkua he dan zawm lote chu hremin an awm thin a, a thente chuan hna pawh an chan phah a. China-ah hian hmeichhia aiin mipa an duhsak zawk hrim hrim a, hei vang hian nau tihtlak luih te nasain kum 1980 atangin gender lamah inthlauhna nasa tak a awm phah bawk.
Kum 2016 khan one-child policy tihtawp niin nupa te chuan fa pahnih an neih remtih a ni bawk a. Hei bakah han Chinese sorkar chuan naupiang tihpun nan hian chhawmdawlna hrang hrang a kalpui zui mek a ni. Mahse, sorkar hmalakna chuan naupiang a tipung tawh chuang lo.
October 2022 khan Chinese president Xi Jinping chuan naupiang tihpun chu ngaih pawimawh berah an neih tur thu Communist Party Congress, Beijing a neihah a sawi a ni.