China-in military-a sum dah tipung

China chuan kumin hian military lama a sum sen chu 7% laiin a tipung dawn a, hei hi a ram tana thil hlauhawm thei thleng thei laka inven zual nana a ruahmanna a ni.
National People’s Congress (NPC) meeting neihnaah budget hi pawm fel niin NPC vek hian President Xi Jinping third term tur a pawmpui zui bawk ang.
Beijing military budget hi $ 225 billion vel niin United States lakah chuan la tlem tak niin US military budget san zawkna hi a let li vel lai a ni.
Mahse, analysts te chuan Beijing chuan military lama a sum sen chu khawvel hriatah a sen aia tlem daih a pholang an ti ve thung. Premier chhuak mai tur Li Keqiang pawhin NPC ah ‘China nawr tawm tumna nasa taka kalpui mek a ni’ tiin a sawi a.
“Kan armed forces te hian military training nasa zawka kalpuiin inpuahchahna tha an nei tur a ni,” tiin a sawi.
NPC meeting-ah hian China chuan economic growth target pawh tihniamin kuminah 5% velah an dah bawk a.
NPC meeting hi Two Sessions tia hriatlar niin kumtina neih thin a ni a. Kumin bik hian pawimawhna thuk tak neiin Communist Party a dinhmun pawimawh leh state institutions langsar te chu siam that danglam tum a ni.
NPC meeting hian Xi chu an ram hruai nawn leh zel turin a nemnghet dawn a, president of China mai bakah head of the armed forces-ah thlan a ni zui leh dawn a ni.
Nikum khan he dinhmun chelh tur hian October thlaah Communist Party chuan an thlang fel tawh a, NPC meeting hi chu a nemngehna satliah mai chauh a ni zawk.
Ukraine chungchang chuan China leh US inlaichinna tichhe zualin tun hnaia spy balloon velin a belh bawk a, hei bakah hian China leh Russian leader Vladimir Putin inlaichinna tha zawka kalpui karah China chuan defence budget a tipung zui dawn ta a ni.
US officials te chuan China chuan Taiwan chu a run duh mai dawn tiin an sawi lawk bawk a. China hian Taiwan tuipui leh a chhehvel hnaih takah sipai nunchan a zir chamchi a ni.
China hian mahnia inrelbawl mek Taiwan hi a province inla hrang angah a ngai a ni a, engtik hunah emaw chuan mainland China nena la inzawm leh turah a ngaih laiin Taiwan chuan mahni inrelbawl ram angah a inngai ve thung.
Kumin NPC-ah hian China chuan premier thar, khawvel ram danga prime minister ang chu an nei thar dawn bawk a, premier hi eocnomy leh administration lama thuneitu sang ber a ni a. Xi a mi rin ber pawl Li Qiang chu premier ni tura ngaih a ni.