China-in Philppines nena an inchuh thliarkar a la

China-in Philppines nena an inchuh thliarkar a la
Chinese coastguard chuan South China Sea-a Philippines nena an inchuh, thliarkar (sandbank) tereuh tê chu an la.
Sorkar thupuanna, CCTV chuan officer pali, a dum veka inthuamten Chinese flag kenga Spratly Islands-a Sandy Cay-a an ding lai an tichhuak.
Channel chuan China hian April thla tir khan ‘tuipui thununa an ram chin a ni tih tihlanna thil an ti’ tih a puang bawk.
Philippine sorkar chuan engmah a la sawi lo va. China nen hian heng laia thliarkar leh hmun eng emaw zat hi an ram angah an chhal ve ve a. Ram an inchuhna boruak hi a tha vak lo va, an lawngte pawh an innghirngho fo a ni.
Sandy Cay hi Manila-in heng lai vela Chinese dan a thlithlaina hmun, Thitu Island-a Philippine military outpost bul lawka awm a ni.
China hian sq metre 200 chauhva zau thiarkar hi a luah em tih leh coastguard hi an kalsan lehnghal mai em ni tih engmah hriat chian a la ni lo.
White House chuan China-in Sandy Cay a la tih hi a dik a nih chuan ‘thil duhawm lo tak’ a nih thu a sawi.
Financial Times-in US National Security Council thupuangtu, James Hewitt-a sawi a tihchhuahah chuan ‘an chet dan chu heng lai vel himna tiderthawngtu leh khawvel dan bawhchhiatna’ a nih thu a sawi a, White House chuan ‘an thawhpuite nen ngun takin an thlithlai zel dawn’ tih a sawi bawk.
Chinese-ten thliarkar an lak mek lai hian US leh Philippine sipaite chuan kum tina an neih thin nunchan, Balikatan an tih chu an kalpui dawn mek a. China chuan he drill hi an duh lo hle.
Nunchan zirnaah hian sipai 17,000 vel an tel dawn a. US Marine Air Defense Integrated System atangin Pathianni khan Philippines hmar lam vaukamah missile pawh kah tawh a ni a, he system hian missile tak tak a kah vawi hnihna Philippines-a chhawp hmasak ber a ni a. Drill-ah hian US anti-ship missile system NMESIS pawh a tel dawn.
Philippines sipaite chuan drill hi an ram himna tur enchhinna a nih thu leh eng ram mah tum bik erawh an neih loh thu an sawi.
“Hetiang training hi chu kan tan a hlu tak zet a ni,” tiin Third Marine Littoral Regiment Officer John Lehane chuan a sawi.
South China Sea-a hmun tam tak hi ram eng emaw zatin an inchuh reng a, tun hnaiah a nasa zual a.
China chuan a tam ber chu an ramah an chhal a, ‘nine-dash line’ tih hmangin an ramah an rin lut a. He line hian an rama province chhim ber, Hainan atanga mel tam taka hla chhim leh khawchhak lam zau tak a huam a. Beijing hian heng hmuna insawh ngheh nan hian in sain lawng sipaite pawh an patrol thin.
Vietnam, Philippines, Taiwan, Malaysia leh Brunei te pawhin thliarkar thenkhat chu an ramah an chhal ve bawk.