China-in Russia a pui tih finfiah
theihah Ukraine inchhal
Ukraine chuan China-in Russia-a ralthuam siamna hmunte an pui ngei tih finfiahna an nei niin Kyiv-a foreign intelligence service chuan a sawi.
Ukrinform news agency-in Thawhtannia Oleh Ivashchenko-a kawmna an tihchhuahah Ukraine hian China-in Russian sipai ralthuam siamna hmunpui 20-ah ralthuam siamna hmanrua an pe ngei tih ‘fiahna an nei’ tih a sawi.
Beijing hian Moscow-in a thenawm ram a rûn mekah a pui nia Kyiv-in a puhna chu a lo pha tawh thin.
Thla hmasa khan Ukraine hian China-in Russia-a ralthuam siamna hmun a puih thu an lo sawi tawh a. Ivashchenko-a chuan tunah chuan an intelligence agency-ten an finfiah thei ta tih a sawi a ni.
“China hian khawl, bawlhlo pawimawh bik, gunpowder leh thil dang, ram venhimna hmanraw siamnaa hman tur chu a pe ngei tih lanna kan nei,” a ti a. “Russian factory 20-ah an pe,” a ti.
China hian indona kal mekah tan bik a neih lohzia tihlan a tum tawh thin a, lehlam a pui nia puhna pawh a pha zel a, sumdawnna leh eibar dapna kawngah erawh Russia-in February, 2022-a Ukraine a rûn hnuah inkungkaihna thuk zawk erawh an siam a. Khawthlang ramten Moscow an hrek nat zual laia hetiang hi ti a ni.
Ukraine hian China-in Russia a puih thu hi a lo sawi fo tawh a, Beijing hian Russian sipaite zingah a sipaite a tir ve niin an lo sawi hial tawh.
Thla hmasa khan Ukrainian President Volodymyr Zelensky-a chuan China-in Russia-a ralthuam siamtute hnenah gunpowder leh hmanraw dang a pek thu hi ualau takin a lo sawi tawh a, Chinese-ten drone siamnaah an pui bawk niin a sawi.
China erawh chuan ‘finfiahna awm lo’ tiin a chhang a, Kyiv hian Chinese company pathum a hrek zui nghe nghe.
Ivashchenko-a chuan Ukrainian intelligent-ten kum 2024 leh 2025-a thlawhna lama Russian-Chinese thawhhona fiahna panga an nei tih a sawi a. Heng zingah hian hmanrua, spare part leh lehkha pawimawh inthawn pawh a tel tih a sawi.
Bawlhlo pawimawh bika an inthawn paruk fiahna an nei bawk niin a sawi a, a sawi thui lo thung.
“Kum 2025 tir lam thleng khan Russian drone-a electric thil bik 80% kha China atanga chhuak a ni,” tiin Ivashchenko-a chuan a sawi.
Hetianga Beijing puhna a awm mek lai hian Ukraine-a Air Force chuan Pathianni zan khan Russia-in drone hmanga nasa taka beiin an beih nat ber zan ni hialin an sawi.
Russian sipaite hian drone 298 leh missile 69 an kap chhuak nia sawi a ni a; mahse, Air Force chuan drone 266 leh missile 45 an kap thla tih an sawi.
China-in Russia a pui tih finfiah theihah Ukraine inchhal
Get real time updates directly on you device, subscribe now.