ICMR director general-in Covid kai pungah chiai la tul lo ti

ICMR director general-in Covid kai pungah chiai la tul lo ti
Ram chhung hmun thenkhatah Covid kai pung leh mah se Indian Council of Medical Research (ICMR) Director General Dr Rajiv Behl-a chuan a la hlauhawm loh va, chiaina tur a awm lo tih a sawi.
Covid chi thar chhui chungchanga Thawhtannia thuthar lakhawmtute a kawmnaah chhim leh khawthlang lama sample an lakte an zirnaah a chi thar hi a na lem lo va, Omicron sub-variant an nih thu leh LF.7, XFG, JN.1 leh NB. 1.8.1 an nih thu a sawi.
A hmasa pathum hi a tam zual tih Dr Bhel-a chuan a sawi a, “Hmun danga sample pawh endik mek a ni a, ni hnih thum hnuah chuan eng variant nge a nih a hriat theih ang,” a ti.
ICMR director general hian hri kai hi a tirah chhim lamah an pung a, khawthlangah pung lehin tunah hmar lamah a pung veleh tih a sawi a. Heng khawpuite hi Integrated Disease Surveillance Programme (IDSP) hmanga vil reng a ni tih a sawi.
ICMR hnuaia ram puma respiratory virus sentinel surveillance network pawhin thlithlain a kai pun dan leh a darh dan an thlir reng tih a sawi bawk.
“Hri kai an pun hian thil pathum kan en thin a. Eng anga inkai darh nge, eng ang taka chak nge tihte a pawimawh thin a. A hmaa hri darhah kha chuan ni hnihah a let a nih hman thin a, tun tumah erawh chutiang anga darh chak chu a ni lo,” a ti.
“Kan taksa ralvengin eng ang chi (variant) nge a dan theih tih a pawimawh leh a. Variant thar an lo kal hian kan taksa ralveng an patlang thei a, chu chu a nih dan tur a ni emaw, vaccine-in a veng lo emaw a ni thei a. Eng pawh ni se tunah hian chiai a hun rih lo,” tiin Dr Bhel-a chuan a sawi.
A dawtah chuan hri kaiten eng ang takin nge an tawrh thin tih chu a pawimawh leh bawk tih a sawi a. “Natna benvawn nei lo taksaah eng ang taka nain nge a thawh? Tunah rih chuan a la hniam hle a, chiaina tur a ni lo,” a ti.
Dr Bhel-a hian union health secretary kaihhruaiin Pathianni khan an thukhawm tih a sawi a. “Thil kan thlithlai a, kan iring reng bawk a. Vantlang pawh inrin a ngai a; mahse, chet rum rumna hun a ni lo,” a ti.
Officer chuan WHO-in a chhinchhiahnaah pawh variant tharte hi a thawk na lo tih a sawi a. “Mi a raltit viau a tul lo va, tih dan tur pangngai bak a dang tehchiama hmalakna tur a awm belh lo,” a ti.
Invennaa a tihchakna, booster dose mamawh a nih leh nih loh chungchangah pawh a tul lo tih a sawi a. “India hi a tul chuan vaccine siam thei a ni a, a hunah kan siam mai ang,” a ti.
May, 2025 khan WHO chuan LF.7 leh NB.1.8 subvariant-te chu thlithlaina mek a ni a, ngaihven ngai huangah a dah lo va; mahse, heng variant hi China leh Asia hmun thenkhatah hri kai tipungtu a ni mek.