China-in Russia thlawp langsar ta

Khawvela economy lian ber ber finance minister rual India rama inhmukhawm te chuan China-in Russia ina Ukraine a run demna thu a sawi duh loh avangin thuchhuah intawm inthurualin an siam thei lo.
Beijing chuan G20 in thuchhuah siam a tum a, Russia-in Ukraine run chu ‘a na thei ang berin a dem’ tih chu a pawm duh lo a ni.
Moscow chuan ‘anti-Russian’ khawthlang ramte chuan G20 ‘an tinghing tiin a sawi zui bawk a.
A hma lawkin China chuan Ukraine indona tihtawp a nih theihna turin ruahmanna a siam tarlanna a nei a, chu chu ram dangte chuan pro-Russian tiin an sawisak thung.
G20 talks Bengaluru a thlengtu India chuan meeting atangin ‘chair’s summary’ siamin Ukraine chungchangah leh Russia laka hrekna kalpuiah ‘thlir dan inang lo a awm’ tiin a sawi a.
Footnote-ah paragraph hnihah indona chungchang chu sawiin ‘member ram tin te China leh Russia tih loh chuan an pawm vek’ tiin tarlan a ni a. He paragraph hi nikum November thlaa G20 Bali Leaders’ Declaration behchhana siam kha niin khatah kha chuan ‘Russian Federation in Ukraine a chetlakna a neih mek chu a na thei ang berin a dem’ tih a ni thung.
Tunah erawh Beijing chuan Ukraine buainaah diplomacy lama chinfel tuma hmalakna nasa zawkin a kalpui a. Tun hnai lawkah pawh top diplomat Wang Yi chuan Europe fangin Moscow pawh tlawhin Russia President Vladimir Putin chuan ropui takin a lo hmuak a ni.
Kar kalta khan China chuan Ukraine-a indona tihreh a nih theihna turin 12-point plan tichhuak bawkin chuta chuan peace talks neih leh national sovereignty inzahsak tih chu a tarlang a. Mahse, 12-point document ah hian Russia chuan Ukraine atangin a sipaite a hnukkir tur a ni tih ziah lan a ni lo va, Russia-in Ukraine a run chu demna thu a tarlang hek lo.
Chinese document hi Russia chuan thlawpin lawmawm a tih thu a sawi a. US President Joe Biden thung chuan, “President Putin-an kut a beng a, thil tha tak a ni dawn em ni?” tiin China document chungchang chu a sawi thung.
G20 meeting neihnaah Ajay Seth, senior Indian official chuan press conference a neihzuiah Russian leh Chinese aiawhte chuan Ukraine kaihhnawihah thumal hman danah inlungruallohna an nei tia sawiin a chhan chu ‘economic leh financial kaihhnawih thil a nih vang a ni’ tiin a sawi.
“Ram dang 18 zawng te chuan indona chuan khawvel economy-ah hasratna nasa tak a siam tih an pawm thung a ni,” tiin a sawi bawk.
Summit summary phek 17-a chhahah hian tun hnaia Turkey-a lirnghing chungchang te, low and middle income ram leiba chungchang te, global tax policy leh food inseurity chungchang te ziah lan a ni bawk.
Russia foreign ministry chuan thuchhuah siam zuiin “G20 activity te chu Khawthlang ram intelkhawm tena anti-Russian kawnga hman an tum avangin tihbuai a ni zui zel,” tiin a tarlang zui thung a.
United States, European Union leh G7 ram te chu ‘blackmail’ kalpuiah puhin, “khawvel hi multipolar world a ni tawh tih pawm teh se,” a ti zui bawk.
Mahse German Finance Minister Christian Lindner chuan, “Hei hi indona a ni a. He indona hian chhan a nei a, chung zinga pakhat chu Russia leh Vladimir Putin a ni a. Chu chu chiang takin G20 finance meeting-ah tarlan ngai a ni,” tiin a sawi.
G20 meeting hmasa nikum February hnua Russia in Ukraine a run hnua neihah pawh Ukraine indona chungchangah joint statement an lo siam thei tawh lo bawk a.
Kar kalta Ningani erawh kha chuan UN General Assembly New York a neihah Russia-in Ukraine a run chu an dem thu resolution siam ni thungin, a demna lam pawm ram 141 an awm a, ram 32 an hai a, ram pasarih Russia pawh telin a duh lo zawngin vote an thlak thung.