China leh Russia-in US-a Cuban hruaitu Castro-a thubuai siamsak dem

China leh Russia chuan US-in Cuban president hlui, Raúl Castro-a tualthah thubuai siamsak tura thutlukna a siam chu an dem thu an sawi.
Chinese foreign ministry chuan US chu a thawhpui ram laka ‘nawr luih’ leh ‘vauna’ hmang tawh lo turin a ngen a, Kremlin chuan Havana chunga nawrna siam chu ‘ramria tharum thawhna’ a nih thu a sawi bawk.
US chuan Castro hi kum 1996-a thlawhtheihna pahnih tlak chungchanga inhnamhnawihah a puh a, he thil thlengah hian mi pali an thi a, Washington leh Caribbean thliarkar inkara inpalaina a buai zual bawk.
US President Donald Trump-a hian Cuba hi na zawka nawr a tum fo tawh a, communist sorkar paih thlak dan tur pawh tlang takin a sawipui tawh bawk.
US hian an ram hrekna thar a siam a, Cuba-a tuialhthei thawn pawh a dang a, hei hian harsatna a tizual a, power awm lo leh ei tur tlakchhamna a thlen rei tawh hle.
Kremlin thupuangtu, Dmitry Peskov-a chuan Ningani khan Russian sorkar chanchinbute hnenah Castro-a laka thubuai siam telin US-in an thawhpui ram laka nawrna a kalpui chu ‘pawm theih loh’ a nih thu a sawi.
“Eng dinhmunah pawh hetiang thil hi tharum thawhna nena inria awm a ni a, ram hruaitu hlui emaw, tuna hruaitute emaw lakah hman tur a ni lovah kan ngai,” a ti.
Chinese foreign ministry thupuangtu, Guo Jiakun-a chuan a hmain US-in ‘kil tina tharum thawh zawnga mi a vau hi a bansan tur a ni’ tih a lo sawi tawh a, Beijing chuan ‘Cuba chu nghet takin a thlawp’ tih a sawi bawk.
Beijing chuan ‘a chhan eng pawh ni se, pawn lam atanga Cuba chunga nawrna siam tumna’ chu a dodal thu a sawi bawk.
Guo-a chuan, “US hian hrekna leh dan anga hmalak tumna hi Cuba laka nawr luihna hmanrua atan a hmang tawh tur a ni lo va, kil tina tharum thawhna hawia vau hi a ti tawh tur a ni lo,” a ti.
Castro-a hi Nilaini khan mi dang panga nen thubuai siamsak a ni a, thlawhna pahnih hi kah thlak nia sawi a ni a, Cuba leh Florida inkara an thlawh laiin a ni.
Dam chhung lung ina tan emaw, thi tura hrem theih emaw a ni.
Thlawhtheihna hi Cuban-American pawl, Brothers to the Rescue enkawl niin an tlak lai hian US mi pathum an phur a, an vai hian an thi vek a. He thil thlen lai hian kum 2018-a president a nihna atanga bâng, Castro-a hi Cuban sipai hotu a ni.
He thil thleng hi US-a cheng Cuban-ten an au chhuahpui nasa hle a, hun rei tak chhung chu Washington leh Havana inkara inrem lohna a chhuah phah.
Cuban President Miguel Díaz-Canel-a chuan thubuai hi ‘politic thila kalpui, dan anga tanchhan nei lo’ tih a sawi.