China Open hnehtu Gauff

On Oct 8, 2024 13 0

World number six Coco Gauff chuan unseeded Czech player Karolina Muchova awpbet chungin China Open title a hlawhchhuak a, a career-a a vawiriatna atan WTA title a sualchhuah rualin kumin January thla hnu lama a trophy lak hmasakber a ni.
American fourth seed hian kartir lam khan a serve kawngah harsatna a tawk a, tun final hmaa a match hmasa pathumah set hloh chungin hnehna a chang chho hram hram a, kumin kumtir Auckland title a lak hnu lama final a luh leh hmasakberah erawh 2023 US Open champion hian chu harsatna chu Beijing khawpuiah a sukiang thei ta a, darkar khat leh minute 17 lek chhungin Muchova lakah 6-1 6-3 hnehna a chang.
Gauff hian Forbidden City-a trophy a lak hnuah fiamthuin a hmasawnna chu mipa lama champion Carlos Alcaraz nen fiamthuin a intehkhin vel!
American mihang player chuan, “Imperial Palace hian vanneihna min thlen a ni. Nakkumah pawh he vanneihna beisei hian ka lo kir leh ang,” tiin Chinese supporter-te a chhaihfiam.
Kum 20 mi laka tlawm ta world number 49 Muchova kha 2023 US Open laia a banrek a tihnat hma khan WTA ranking-ah number eight a luah chho hman a; kumin hian leirem a rawn rap chho leh mek a, Beijing final a luh hma hian round hmasa lamah top seed Aryna Sabalenka leh tualchhung beiseina, Olympic champion ni bawk Zheng Qinwen a vaw tla thei ngat a, final-ah Gauff a khan ta ngang lo mai pawh a!
Kum 28 mi Czech hian a hmaa American player la naupang tak a hmachhawn vawihnihah pawh hnehna a chang zo lo tawh a, pakhat chu nikum Cincinnati Open final kha niin, WTA final a khelh hnuhnung pangaah vawili a tlawm tawh bawk.
Hnehna a chan hnuah Gauff hian a coach thar Matt Daly chungah lawmthu sawi nghalin, Daly kaihhruaina hnuaia tournament a hmachhawn vawikhatnaa hnehna tluantling a sualchhuak nghal chu ropui a tih thu a sawi.
US Open ourth-round paltlang zo loa a title kawl lai a humhim zawh loh hnu thla hmasa mai khan Gauff hian a coach chhawr lai Brad Gilbert a ban a, coach thar hnuaiah champion boruak a tel zui leh ta a ni.
Beijing khuaa WTA 1,000 event title a lak hnuah hmeichhe tennis season kahrna WTA Finals khel tur zawnna kal mekah palina a luah chho a; November thla hian Riyadh khawpuiah ranking-a a sang pasarihin season-ending tournament hi an khel dawn a, qualifying kal mekah nimin atang khan Wuhan Open an khel tan leh chiah a ni.