China ramri bulah India-in sipai airbase nei ta

China ramri bulah India-in sipai airbase nei ta
Indian air force chief chuan China nen ramri an intihbuai fona hmun, Himalaya tlangdunga indo thlawhna an tumtir theihna tura an siam thar hmunah sipai bungraw phur thawhna a tumpui ta tih defence thuneituten Ningani khan an sawi.
Nuclear ralthuam nei ram pahnih inkar hi hun eng emaw chen a chhiat hnuah tun hnaiah a tha thar mek a. October thla khan an ramri, tumahin kutthlak theih lohna hmun an siama sipai an dahte hnuk kir tura inremna an siam a, kuminah Prime Minister Narendra Modi-a’n China a tlawh zui bawk.
Air Chief Marshal A.P. Singh-a chuan Nilaini khan C-130J thlawhna hi Ladakh-a Mudh-Nyoma air force station-ah a tumpui a, a hmun hi feet 13,000 chuanga sang niin hmun pawimawh tak niin ram venhimna lama thawktute chuan an sawi.
Airbase thar hi heng lai hmuna station pathumna niin China nena an inrina, Line of Actual Control (LAC) atanga km 19 chauhva hlaa awm a ni.
“Ladakh-a airfield thar hi indo thlawhna tumna atan pawha hman theih a ni a, a khawi lam ve veah pawh kan tana tangkai tak tur a ni,” tiin Air Marshal Sanjeev Kapoor-a chuan X-ah tar langin an thenawm, China leh Pakistan a sawi tel.
China pawhin hetiang vela sangah hian airfield a nei tawh niin a sawi.
An inkar titha hret hret mah se China leh India hi an inringngam tak tak o niin Indian mi thiam leh thuneitute chuan an sawi a. Indian Army chief pawhin kuminah hian ramri hrulah sipai hmun leh thil pawimawh dang tam zawk siam tum a ni tih a lo sawi tawh.
India leh China hian ramri chiang lo tak km 3,800 vel intawmin kum 1950 chho vel atangin an intibuai reng a. An indo nasat ber tum chu kum 1962 kha a ni.
Kum 2020 khan an intibuai leh a, kum 2024 khan inremna siamin inkawmngeih pawh an tum hle a, thlawhnaa an inthlawhpawh loh pawh an chhunzawm leh tawh.