Fu man sang phuta intihbuai- naah tractor 100 chuang hal
Fu man sang phuta intihbuai- naah tractor 100 chuang hal
Karnataka-a Bagalkote-ah fu chingtute lungawi loh lantirnaa tharum thawhna thlengah Godavari Sugars Factory chhunga awm fu phur tractor 100 chuang hal a ni a, buaina nasa tak a chhuak.
Thlalak leh video darhah chuan tractor-te hi factory chhunga an ding tlar a kang hluah hluah a, a khu pawh a chhehvelah a zam darh nasa hle tih a lang a. A bul hnaia lo awm motorcycle pahnih pawh buaina chhuak zuiah hal a ni bawk.
Ningania thil thlengah hian a hmunah hian police awm ve bawk mah se mipuiin an tam hneh a, district thuneituten boruak thunun tumin hma an la zui bawk a. Superintendent of Police Siddharth Goyal-a pawhin a hmun hi thleng tawhin boruak tihdaih tuma hma lak mek zui a ni.
Lo neitu hruaitu, Subhash Shirabur-a chuan thil kangte hi an hal a nih loh thu a sawi a. ‘Factory nena inzawmna neiten’ an tih nia sawiin police officer-te awm lai ngeiin an che niin a sawi.
“Fur phurtu tractor-te hi pakhat mah kan hal lo va. SP pawh a awm reng a. Lungin min rawn vawm a, kan mite leh police thenkhat pawhin hliam an tuar zawk a ni,” a ti.
A titute hian police lirthei leh lo neitute an tum a, factory chhungah hian ‘lo neitute tih anga thil a lan theih nan hetiang hian an che ta’ niin a sawi.
Tun tum buaina hi fu chingtute leh sorkar inkara a man chungchanga inrem lohna awm atanga chhuak a ni a. Mudhol-a lo neitute hian fu tonne khat Rs 3,500-a leisak an phut a, kar hmasaa Belagavi-a lo neitute Rs 3,300-a leisak tura tihna an pawm mai ang chu an pawm ve duh loh vanga chhuak a ni.
A hmain mi za telin fu man tihsan phut hian tractor leh bawngtawlailir thahnam takin Sangolli Rayanna Circle-ah kawng an lo zawh tawh a, hemi tum hian auto-rickshaw pawhin zawmin Mudhol khaw chhungah thlai thar man man zawka sorkarin lei theih an phut thu an lo aupui tawh.
Tharum thawhna a chhuah hnuah hian Criminal Procedure Code Prohibitory Section 144 chu Jamkhandi, Rabkavi-Banahatti leh Mudhol-ah puan nghal a ni a, Deputy Commissioner Sangappa-a chuan boruak a daih leh theihna turin police tam zawk a tir lut nghal bawk.
Vijayapura, Belagavi leh an thenawm district dangah buaina hi a kan kai mai hlauhthawn a nih avangin venhimna pawh tihkhauh lehzual a ni bawk.