China-US indo chuan chhiatna thleng ang ti

China defence minister chuan US nena indona a awm a nih chuan khawvel tan ‘chhiatna turu’ tak a thleng ang tiin a sawi.
Security summit neihnaah General Li Shangfu chuan ‘ram thenkhatte’ chuan Asia ramah ralthuama intlansiakna an tizualkai tiin a sawi bawk a.
Khawvel chu China leh US tan a lian tawk tia sawiin ram lian pahnih te chuan ‘common ground’ an zawn a ngai a ti bawk a. A hma lawkin US chuan Chinese destroyer chuan Taiwan Strait a US warship chu a hnaih lutuk tiin a sawi a.
Kar kalta Inrinni khan US navy te chuan Chinese destroyer chuan Canadian vessels nena Taiwan strait inpelh dawn laiin American warship chu a hnaih leh lutuk tiin an sawi.
China chuan US leh Canada te chu buaina chawhchhuah tumah puhin a sawisel a, US leh Canada te chuan international law in a remtih ang thlapa awm an nih thuin an chhang thung.
Gen Li hi March thla khan China defence minister a ni a, US chu ‘Cold War mentality’ neihah puhin security atana pawi theia chetla zui rengah a puh tawh bawk.
A thusawiah China chuan US in naval patrols a neih te chu a remti ngai dawn lo tia sawiin US leh a thurualpui ram te chuan ‘freedom of navigation chhuanlamin China lakah exercise an kalpui’ tiin a sawi bawk.
Taiwan Strait chungchangah pawh helai region a awm ve lo pawn lam ram te chuan boruak an tisosang tiin a sawi bawk a.
Heng thute hi Li Shangfu hian Singapore-a Shangri-La Dialogue neiha a sawi niin, Asia-Pacific region a ram tena annual security meeting an neih thin a ni.
Gen Li hi US chuan kum 2018 khan Russia atanga China in ralthuam a lei avangin a lo hrek tawh a, he mi chungchangah hian US in ‘direct military talks’ neih a rawtna chu Beijing chuan a hnawl a ni.
Singapore summit-ah hian US Defence Secretary Lloyd Austin chuan China chu military discussion neih duh ngai lo tiin a hau ve hrep thung a.
Gen Austin leh Gen Li te hian event’s opening dinner neih hma in inchibaina hun an nei a, an inbe nual a, a hnu lamah erawh inbiakna an nei zui lo tia sawi a ni.
China defence minister thusawi hian nem lam a pan tia ngaih theih niin US nena hun lo a kal tura inbiakna neih theihna kawng inhawnga ngaih a ni a, mahse, chu mi tur chuan Washington chuan a laka hrekna a kalpui chu a hlih hmasak phawt a ngai ang tiin Zhou Bo, People’s Liberation Army a retired officer chuan a sawi.
Gen Li hi kum 2018 khan Russia atanga military hardware a chawk luh avangin hrek na ni a. Kumin kum tir lamah China defence minister nih tanin kum nga chhung chelh tura ngaih a ni a, mahse, hrek a tawh avang hian US-ah a zin thei lo va, hei vang hian inbiakna nei tur pawha insawm a harsa dawn tiin Zhou chuan a sawi bawk.
“Hrekna kalpui tlat chuan engtiangin nge inbiakna neih theih a nih ang? Hrekna hian nghawng a nei thui a nia” tiin Zhou, tuna Tsinghua University a Centre for International Security and Strategy, Beijing a thawk mek chuan a sawi a.
Singapore summit-ah hian spy chiefs meeting neihnaah Sneior intelligence officials te pawh an tel tia sawi a ni a. US leh China te inbakkaih reng chung hian US state deparrtment official thenkhatte chu inbiakna nei turin Beijing-ah an lut thung a.
Washington leh Beijing inlaichinna hi tun hnaiah a chhe hle a, China in Taiwan a ram anga chhalna te leh South China Sea a tuipui inchuhna te chu a tizualkai ber tu anga ngaih a ni.
Senior PLA official, Lt Gen Jing Jianfeng chuan Taiwan chungchangah inremna a awm thei dawn lo tia sawiin US chu helai region thila inrawlhluiah a puh bawk.