Chinghnia avanga sial vulhtute harsatna Serchhip MJA-in enpui

Last updated Jul 19, 2023 9 0

Chinghnia avanga sial vulhtute
harsatna Serchhip MJA-in enpui
Chinghnia avanga harsatna tawk Sailulak khuaa sial vulhna hmun chu MJA Serchhip District chuan Nilaini khan district veterinary officer Dr R Lalmakthanga hoin an tlawh.
Sailulaka sial vulhtu pawl, Sailulak Sial Vulh Association chairman Lalramthanga sawi danin, an khua in eizawnna atan sial vulh an thlan tihhlawhtlinna atan 2017 June 18 khan an vulh tan a; sial vulh an tam lai berin 48 an awm a, tunah hian mi 46-in an vulh. Kum 2020 tir lam thlengin harsatna tawk loa an awm laiin hemi kum tawp lam atangin chinghniaten harsatna an thlen.
AH & Vety department-in an sial vulh kawngah nasa taka an tanpui thu leh an mamawh hrang hrangte pawh an ngaihtuah sak thu sawiin, tunah hian sial 300 chuang neiah an inngaih thu leh mimala ngah berin 30 a nei tling lo deuh tih a sawi a ni.
Sailulak Sial Vulh Association chairman chuan kum 2020 khan chinghnia vang hian sial 8, 2021-ah 16, 2022-ah 30 chuang an chan nia an hriat thu a sawi a. Kumin hian sial 12 ruang an hmuh tawh thu leh chin hriat loh 20 vel a la awm thu a sawi a. Chinghnia avanga sial an chante hi Environment Forest department-ah thlenin zangnadawmna pawh an pe a, amaherawh chu mi pakhatin sial 3-ah chiah zangnadawmna an hmu thei a, pakhatah Rs. 30000 zel an hmu thei a, sa avanga sial chan ang angah zangnadawmna hi hmuh ve theih an duh tih a sawi.
Serchhip MJA hian Leng khuaa sial vulhtu pawl, Mithun Cooperative Society Ltd. hruaitute pawh kawmin an secretary F Rohlupuia sawi danin, tunah hian an khuaah sial vulhtu mi 24 awmin, sial 135 vel an nei mek a; nikum leh kum hmasa lamah chinghnia in an sial 60 chuang sehin, sawrkar hotute hnena harsatna an thlen atangin sial 20 velah zangnadawmna an hmu thei. Kumin hian chinghnia in an sial 13 sehin ,11 an thi a, pahnih erawh an enkawl dam a ni.
Serchhip DVO chuan se venna atana an mamawh turte bungrua bakah hnatlang leh thil tula an hman turin sumfai a hlan a. Sailulak khuaa sial vulhtute harsatna chu sawrkarah an thlen zel thu sawiin, sawrkar laipui thlengin he harsatna hi an hre tawh tih a sawi.