Aizawl hmar lama Chite lui luantlang veng 16 local council leh NGO-te chu Save Chite Lui Coordination Committee chuan kawmin Chite lui vawnfai leh humhalh zel dan tur an sawipui.
-- Advertisement --
He Committee chairman, chief secretary Dr Renu Sharma chuan Chite lui vawn thianghlim chu Mizoram sawrkarin ngaipawimawhin humhalhna dan engemawzat a siam tawh a, a hlawhtlinna tak tak erawh mipui kutah a awm tih a sawi. Bawlhlhawh leh tui chhia paih danah mipui kan fimkhur tawk lo hle tiin, tan la thar turin mi zawng zawng a sawm.
“Chite luikama awm veng leh khua in pawimawh bik hle a, neitu thinlung pu a, lui tih chereu theihven kawngah theihtawp chhuah turin ka ngen che u a ni,” a ti.
Save Chite Lui Coordination Committee hmalakna sawiin, lui thianghlim tak siam thuai a nih theihna’n sawrkar department te, local council, kohhran leh tlawmngai pawl thawhhona tha a pawimawh tih Dr Renu Sharma hian a sawi a ni.
Principal chief conservator of forests RK Singh chuan Chite lui chereu zel tur venhim nan leh tuihna tha neih theihna’n thing leh mau humhalh a pawimawh tih sawiin, ramngaw venhim kawngah theihtawp chhuaha thawh ho puiah a sawm.
Aizawl bawrhsap Dr Lalhriatzuali Ralte chuan mipui rilru sukthlek tihdanglam a ngai tih sawiin, khawtlang hruaitute chu midang tan entawn tlak ni turin a chah.
Thutkhawmah hian Chite lui chhanchhuah leh humhalhna atana hmalak tawhna leh hmalak mekna a lem nen thlir ho a ni a. Local council leh tlawmngai pawl hruaituten Chite lui chhanchhuah leh humhalh kawnga an ngaihdan, beiseina leh rawtna an sawi a; heng rawtna leh thil sawite hi a theih ang anga bawhzui tura chhinchhiah a ni.
Inrawnkhawmna hi Aizawl Central leh Aizawl South lam veng hrang hrangte tan thawh thum dang la neih tum a ni.