Chona lian — Rorelna Dik

“Sawrkar thar hian kan bul tan nan, Lal Isua thusawi, ‘Kal la, tisual leh tawh suh’ a tih kha kan rilruah kan vawng reng a. Tunhmaa thil lo kal tawh, inchhui vak vak emaw, khatiang lampang kha kan rilruah a awm lo…”
“Tun atang erawh chuan, mi tinin dik takin thil kan ti tur a ni a, diknaa rorel a intan tawh hnua tisual leh chungah erawh chuan kan khauh dawn…”
Hei hi, Mizoram sawrkar thar hnuaia Chief Minister thar Lalduhoma’n nimina rinawmna thu a tiam hnua thuthar thehdarhtute kaltlanga mipui hmaa a thusawi hmasak ber a ni.
Nimina chief minister thar thusawi pumpuiah khan chona hrawl pui pui mai a inzep tûn mai a. Chung zinga a langsar ber leh a khaikhawmtu ber chu, ‘Diknaa ro rel’ tih kha a ni.
Tunhmaa sawrkarna lo inchelh chhawk zak zak thin party pahnih Congress leh MNF te pawh khan, ‘diknaa rorel’ tih hi thupuia an lo neih ve ve tawh kha a ni a. Congress party khan Bible chang Amosa 5:24 (..rorelna dik chu lui angin luang sela…) kha tlawhchhanin, sawrkar office building zawng zawng deuhthawah kha thuziak kha a intar nghe nghe a. MNF party pawhin ‘Pathian leh kan ram tan’ an ti a; Pathian hming an lam a, Pathian duh dana kal kha an tum tihna a ni. Pathian hming lam rik a nih hian, “Dikna” a keng tel nghal a ni.
Tuna sawrkar thar hruaitu lu ber pawh hian mipui hmaa a thusawi hmasak berah Lal Isua hming a lam ri hmasa ber a; Diknaa rorel chu an hmachhuan a ni tih chiang takin a sawi a, a hnu zela a thusawi pawh, diknaa rorel kaihhnawih vek a ni. Chona a lian hle a ni.
Sawrkar thar hian chu Chona lian tak mai chu a rawn hmachhawn ve leh ta a. Chona hmachhawn thei tura thuneihna petu chu mipuite an ni a, mipuiin an chungah beiseina lian tak an neih avanga he dinhmuna inhlangkai hi an ni. Rorelna dik nena he ram hi an kaihruai thei a nih phawt chuan mipui hian châng dang hi an kan san mai mai tawh lovin a rinawm. Rorelna Dik beiseiin hma lam i thlir leh phawt mai ang u.