Churachandpur shutdown in thlawp hlawh

October 2-a tribal-te chenna Churachandpur district, Manipur-a shutdown chuan nunphung a tikhaihlak hneh hle.
Kuki organisation te chuan mi pasarih an zinga kum tling lo pahnih te National Investigation Agency (NIA) leh Central Bureau of Investigation (CBI) tena an man an duhlohna avanga bandh hi huaihawt an ni a.
Heng mite hi kumin July thlaa Manipuri thalai pahnih rukbo leh thah zui an nihnaa inhnamhnawiha ngaih te an ni.
Heng Manipuri pahnih thah te thlalak hi tun hnaiah social media-ah tarlan niin chu chuan Imphal Valley ah lungawilohna nasa tak thlenin case chu CBI te kutah dah a ni zui a ni.
Vehicle tlan a awm lo va, market leh business establishment te kharin a awm vek niin police te chuan an sawi a.
Manipur-a tribal inzawmkhawm Indigenous Tribal Leaders Forum (ITLF) te chuan zing lam dar 10 atanga shutdown hi kalpuiin agency te mi man te chu darkar 48 chhunga chhuah zalen ngei an phut a ni.
Manipuri thalai pahnih kum 20 a upa Phijam Hemanjit leh hmeichhia Hijam Linthoingami kum 17-a upa te chu July 6 khan an chin hriat lohin an awm a, September 25 khan an ruang phochhuahin a awm ta a ni.
Chief Minister N. Biren Singh chuan October 1 khan mi pali lai CBI ten Manipuri thalai pahnih thahnaa inhnamhnawih nia rinhlelh an man tawh tiin a sawi a, sorkar chuan thiltisualtute hi hremna na ber pek an nih theih nan hma a la ang a ti bawk.
CM Singh vek hian September 30 khan he tualthahnaa inhnamhnawih nia ngaih mi pakhat chu Churachandpur-ah man niin chu mi chu Myanmar leh Bangladesh a hel pawl te nena inzawmna neia India laka indona kalpuitu tiin a sawi bawk.
May 3-a Manipur-a ethnic thila buaina avangin mi 180 chuangin nunna an chan tawh a. Manipur buaina hi Tribal Solidarity march atanga intan niin hei hi Meitei community tena Scheduled Tribe (ST) status an ngiat duhlohna avanga neih a ni.
Manipur population-ah Meitei te chuan 53% an hauh a, Imphal valley leh a chhehvelah an cheng ber a. Tribals- Nagas leh Kukis te chuan hill district luah thungin population atanga 40% vel an hauh ve thung a ni.