City an chak laiin Arsenal an chak zo lo

Inrinni zan khan English Premier League (EPL) 2024-25 khelh chhunzawm a ni a, champion lai Manchester City chuan an mikhual West Ham United chu 4-1 in an hneh a, hnehna an chang zawn ve leh ta. City an chak laiin pahnihnaa awm mek Arsenal chuan Brighton lakah hnehna anc hang zo lo thung. Arsenal rual hian London club lian Chelsea leh Tottenham ten hnehna an chang zo lo ve bawk.
City in hma lam an pan
EPL-ah vawi li ngawt champion zawn a, champion zawn ngun record siam hialtu Manchester City chu mak tak maiin an talbuai aaa, inelna hrang hrangah hnehna an chang thei lo zawn tlut tlut. An mahni rau rauah an talbuai thui hman viau laiin hnehna an chang zawn ve leh ta a, champion nawn leh beiseina nei thar lehin hma lam an pan.
Champion lai City hian Etihad Stadium-ah London club West Ham United an mikhual. An mikhual lakah an khel tha viau a, darkar khat an khelh tlin hmaiin goal li ngawt an thun hman. City hian an mualah hnehna chan ngei tumin tan an khawh a, goal pawh an thawkchhuak thuai. Inkhel tan atanga minute 10-na lekah West Ham player Vladimír Coufal chuan an lamah a ti-goal a, mualneitu hmahruaina goal a thunsak.
Hma takah goal an thun vangin City an phur a, inrintawkna sang zawk nen an mualah an inlan chhunzawm. Phurna sang tak nen inlan zui mah se goal an thun belh thei lawk lo thung. Chawlhlawk dawn hnaih minute 42-naah Savinho siamsak tha tak chu Erling Haaland chuan awlsam takin a tauh goal a, an goal hnihna thunin, City hian si hnih faia hmahruai chungin chawlhlawk an hmang.
Chawlhlawk hnu lamah City an khel tha lehzual a, goal hnih an thun belh thuai. Minute 55-naah Erling Haaland chuan an goal thumna thunin an hmahruaina a tizau. Haaland hian Arsenal manager Mikel Arteta chu, “Inngaitlawm takin awm rawh!” tia a zilhhau hnuin a thun thun tluang a tawp teh tlat a, goal thun a harsat. Arteta lakah a sawi loh tawp tur a sawi tih a hriat hnuin Norway forward hian ngaihdam a dil a, ngaihdam a dil hnuin an match hnuhnung pahnihah goal thum ngawt a thun leh ta thung. Haaland goal thun hnu lawkah Phil Foden chuan an goal lina a thun belh zui leh zat bawk.
Si li ngawt an phurh hnuin West Ham tan Niclas Füllkrug chuan minute 71-naah an goal neih chhun thun bawk mah se City lakah tlawm an pumpelh zo ta chuang lo thung. An mualah an chak leh tak vangin City hian khelh 20 atangin point 34 an hmu a, paruknaah an awm. Hmahruaitu Liverpool aiin khelh hnih laiin an khel tam a, point kua zetin an hniam zawk mek thung. Khelh hmabak 18 an la neihah Pep Guardiola naute hian champion nawn leh ngei tumin thapui tak zet an thawh anag.
Arsenal an chak zo lo
Table-ah pahnihna luah a, Liverpool hnaih bertu Arsenal chuan Brighton laka an hmahruaina an humhim zo lova, penalty an chawi vangin point thum an hlawhchhuak zo lo. Brighton lakah an chak zawh loh vangin Reds nen an inkar zau leh zual thei dinhmunah a ding a. Gunners dinhmun a that loh phah leh zual thei dawn.
Arsenal hian American Express Stadium-ah bul an tan chhe lova, rawlthar duhawm Ethan Nwaneri chuan minute 16-na lekah hmahruaina goal a thun. Hun rei tak hmahruai bawk mah se defender William Saliba chuan inhnial theih takin penalty a chawi. He penalty hi João Pedro chuan minute 61-naah a pet goal a, Arsenal nen 1-1 a inhnehtawkin, point khat hlu tak an hmu.
Arsenal rual hian Chelsea leh Tottenham an chak zo lo. Chelsea hi Crystal Palace 1-1 in an inhnehtawk a. Tottenham hi an mikhual Newcastle lakah 1-2 in an tlawm thung.