City chak laiin Newcastle an tlawm
Nilai zan khan UEFA Champions League group Stage khelh chhunzawm a ni a, champion lai Manchester City chuan an khingpui Young Boys chu 3-1 an hneh. City an chak laiin English Premier League club dang Newcastle United chuan an mualah an tlawm ringawt thung.
Haaland a inlar, goal a thun
Champions League 2022-23-ah Manchester City champion pui a, topscorer ni ta hial Erling Haaland chuan UCL season tharah match hmasa pahnihah goal a thun lo teh tlat a. Goal thun loh inhmeh lo tak Haaland hian nilai zana an khingpui Young Boys lakah goal hnih thunin, a zia a chhuah leh tak tak tan ta.
Wankdorf, Switzerland a inkhelah champion lai City in beisei angin an khel tha pup pup bik lova, goal thun turin second half an nghah thlen hial a ngai. Pep Guardiola team te hian ball chang tamin mualneitu Young Boys nawr viau mah se chawlhlawk hmain goal an thun thei lo a. Mualneitu Young Boys pawhin goal hlauhawm an siam tam thei lo bawk a, chawlhlawk hma thlengin beisei ang inkhel hmuh tur a awm lo phawt.
Chawlhlawk hmain goal thun thei bik lo mah se, chawlhlawk hnu lamah City an khel tha a, goal thum ngawt an thun. Second half tan atanga minute thumna lekah Switzerland defender Manuel Akanji chuan hmahruaina goal a thun. Chak tura rin zawkin goal an thun hmasak vangin chak tur zawk chiang ang tluk deuh thaw a ngaih a ni hman a, City in goal an thun belh nual rinna lian tak a awm nghal bawk.
Goal an chhuah hnuin Young Boys chu mak tak maiin an khel tha a, goal thunin an si phurh an sut ta tlat thung. Goal an chhuah atanga minute lina lekah Meschack Elia chuan goal thunin an si phurh a sut. Team lian lakah goal an thun vangin Swiss club hi an phur viau a, an mualah hnehna chan ngei tumin an inlan zui a, City an nawr thei viau bawk. Chak tum takin inlan zui bawk mah se goal hnih an chhuah zui ta thung a, an mualah uiawm takin an tlawm zui ta a ni.
Goal an chhuah a, an hmahruaina an humhim zawh loh hnuin City in goal thun tumin an khingpuite an nawr zui viau a, penalty hmuin an vannei zui ta nghe nghe. City hian minute 62-naah penalty an hmu a, penalty hi Haaland chuan a pet goal a, hma an hruai nawn lehna goal a thun. Haaland hian season thar UCL-a a goat khatna a thun a, a harsatna tawh ve zeuh a su kiang.
Hma an hruai nawn leh hnuin City an khel tha chhunzawm a, hun tawp dawn hnaihah goal an thun belh leh. Minute 86-naah Haaland chuan Rodri siamsak atangin an goal thumna a thun a, an chakna a nem nghet. Hun tawp thlengin goal dang a luh belh tawh lova, City chuan season tharah UCL-ah a zawna vawi thum nan hnehna an chang. Group G-a inkhelah dangah German club lian RB Leipzig chuan RB Leipzig 3 – 1 in Red Star Belgrade an hneh a, pahnihnaah an inhlangkai. Group G-ah hian point kua hmuin City an sang ber a, RB Leipzig in an dawt a, Young Boys leh Red Star Belgrade in point khat ve ve an hmu mek.
Newcastle an tlawm
Nilai zana inkhel dangah EPL club Newcastle United chuan St James Park-a an mikhual Borussia Dortmund chu si khat faiin an hneh lova, an tualzawlah ngei uiawm takin an an tlawm. An mualah an tlawm vangin Magpies hian an hmahruaina an hloh a, pathumnaah an tlahniam.
Newcastle United hi an muala UCL an khelh hnuhnung bera Paris St-Germain hneh thei an nih vangin Borussia Dortmund lakah inringtawk takin an inlan a, khel chhe lem lo viau mah se an mualah an tlawm tlat thung. Inkhel hmuhnawm takah hian chawlhlawk dawn hnaih minute 45-naah Borussia Dortmund tan Felix Nmecha chuan he inkhela goal awm chhun hi a thun a, EPL team lakah point thum hlu tak an hlawhchhuah theih phah.
Group F-a inkhel dangah team lian pahnih Paris St-Germain leh AC Milan an inhmachhawn a, mualneitu PSG in si thum faiin hnehna an chang a, table chung ber an luah theih phah. Newcastle United laka tlawm tawh PSG hian khelh thum atanga point ruk hmuin table chung ber an luah a, an hnuaiah hian point li hmu tawh ve ve Borussi Dortmund leh Newcastle United te an awm a. Italian club lian AC Milan in khelh thum atangin point hnih chiah an la hmu ve thung.
Nilai zan khan Italian club tan zan tha a ni lova, Lazio pawh Feyenoord Rotterdam lakah 3 – 1 in an tlawm ve bawk.