City in UCL last 16 an lut

November 7, Thawhleh zan khan UEFA Champions League 2023-24 khelh chhunzawm a ni a, champion lai Manchester City chuan si thum faiin Young Boys an hnehin last 16 an lut.
Champions League champion Manchester City hian Etihad Stadium-a an mikhual Young Boys lakah an khel tha viau a, chawlhlawk hmanin goal hnih an thun hman. Second half tir lamah goal thun belh thuai mah se tam zawk ni chungin goal tam zawk an thun thei belh thei lo. An mualah si thum faia chak City hian khelh hnih khelh hmabak la nei chungin last 16 an lut a, inelna kal mekah an chetha hle.
City hian an mikhual Young Boys lakah goal thun tumin thapui an thawh nghal a, an mualah ball an chang tam a, an mikhualte an nawr tawm nghal hle. Minute 23-na lekah Sandro Lauper chu Matheus Nunes lakah foul in penalty a chawi. He penalty hi Erling Braut Haaland chuan harsatna tawk lovin a pet goal a, hmahruaina goal a thun. Haaland goal thun hnu hian na takin an mikhualte an nawr zui chiam a, beisei angin goal an thun belh thei mai lo thung.
Goal thun theihna hun tha an hlah fo hnuin City hi chawlhlawk dawn hnaihah an che fuh leh ta nge nge. Minute 45+1-ah midfielder Phil Foden chuan Jack Grealish siamsak atangin goal a thun a, an hmahruaina a tizau. Foden goal thun hnuin goal dang a luh belh lova, City hian si hnih faia hmahruai chungin chawlhlawk an hmang.
Chawlhlawk hnu lamah City an khel tha chhunzawm a, goal an thun leh thuai. Minute 51-na lekah Lewis siamsak chu Erling Haaland chuan goal-ah a chantir a, an goal thumna a thun. Inrinni zanah 6-1 ngawta AFC Bournemouth an sawp tum khan Haaland hi hliam vangin a inlan tluan thei lova, chawlhlawk hnu lamah mual chhung a lut tawh lo. Kartawp-ah hliam a neih vangin Champions League lamah a inlan theih loh mai a hlauhthawnawm hman. Hlauhthawn angin thil a thleng lova, Young Boys lakah tha taka inlanin, goal hnih a thun leh ta hial zawk. Haaland hian Champions League-ah vawi 34 khel tawhin, goal 39 zet a thun tawh a, a chetha vet vet hle. Season liam taah treble champion a nih pui City tan inelna hrang hrangah vawi 70 khelin goal 67 zet a thun tawh bawk a, player ropui a nihzia a tilang chiang hle.
Haaland goal thun hnu hian Young Boys tan chhiat leh zualna a thleng a, penalty chawi tawhtu Sandro Lauper chu minute 53-naah hnawhchhuah a ni. Si thum phur zawk an nih laia tlem zawk an nih zui leh vangin an dinhmun a chhe leh zual a, goal thun tur khawpin an khingpuite an nawr tlang zo lo. Zat leh zat an nih laia goal thum lai khung thei City pawhin mak tak maiin goal an thun belh thei tawh bik lo a, goal dang luh belh lovin inkhel a tawp.
An mualah point thum an hlawhchhuah leh tak vangin Manchester City chuan Group G hmahruaitu an nihna an nem nghet a, khelh li atanga point 12 hmuin last 16 an lut. Khelh hnih khelh hmabak nei chunga last 16 lut City hi UCL-ah last 16 an luh awlsam ber tum a ni hial nghe nghe a, hma taka last 16 an luh theih nan an goal thun khawl Erling Haaland-a’n a thawhhlawk hle a ni.
Group G-a pahnihna RB Leipzig chuan an khingpui Red Star Belgrade chu 2-1 a hnehin point thum an hmu a, last 16 an lut ve nghal bawk.
German club hmasawn chak leh than duang tak RB Leipzig hian Rajko Mitic Stadium-a an khingpui Red Star Belgrade lakah bul an tan tha viau a, Xavi Simons chuan minute 8-na lekah hmahruaina goal a thun a. Hun tawp dawn hnaih minute 77-naah Loïs Openda chuan an goal hnihna a thun belh leh bawk. Si hnih faia hma an hruai hnu hian minute 81-naah Benjamin Henrichs chuan an lamah ti-goal in mualneitu si phurh a sut then sak. Goal an neih hnuin Red Star Belgrade phur thar mah se goal dang an thun belh thei tawh lova, an mualah an tlawm zui ta a ni.
Group G-ah hian vawi li chak zawn tawh Manchester City in point 12 hmuin hma an hruai chhunzawm a. Khelh li atanga point 9 hmu tawh RB Leipzig in pahnihna an luah a, German club hi an hnuaia awm club pahnih point khat ve ve hmu mek Red Star Belgrade leh Young Boys te tan lehpelh theih an ni tawh lo. City leh RB Leipzig ten last 16 an lut chiang tawh a, Europa League lamah tu nge khel chhunzawm dawn tih tihchian zui a ni ang a. Red Star Belgrade leh Young Boys ten Europa League last 16 play-off khelh an inchuh chhunzawm ang.