Civil hospital-in enkawl duh lo…
A thupui hi a dengkhawng viau maithei; tun hnaia raicheha thi ta F.Lallawmkimi chungchang a ni. Inthiarna hmuna nau hring tawh si, enkawl leh buaipui ngai em em, Lunglei Civil Hospital panpui a nih hnua hospital-in a lo enkawl thei lo kha, a dengkhawng zawk hle a ni; lo enkawl se, a chungah hetiang thil hi a thleng kher lo maithei a ni.
A chhan chu, tlai dar 3:30 vela thil thleng a ni a, civil hospital-in an lo hnar takah chuan, hospital dang panpui a ni a, mahse hmeichhe daktawr a lo awm loh avangin tlai dar 5:30 velah civil hosspital Lunglei bawk hi panpui a ni leh ta tho a. Tlai dar 6:35-ah mihring a chang zo ta lo a ni.
Inthiarna hmuna nau hring tawh si, damdawi ina enkawl loha darkar hnih zet phurh kual a han ni ta mai kha, khatiang thil Mizorama a han thleng thei kha a zahthlakin Mizo tan a tlawmthlak a, a thinrimthlak tel bawk a ni.
Hemi chungchangah hian health minister Pi Lalrinpuii chuan, nimina MUHCS 2.0 tlangzarhnaah, he thil thleng chhuifiah tur hian Inquiry lak mek a nih thu a sawi a. A bial chhunga nu nau chunga thi chanchin chuan a rilru a tihhrehawm thu leh thihna tuartute a lainat thu a sawi a. Damdawi in lamin tanpui ngai ngawih ngawih an lo hnar mai nia sawi chu a lungchhiatthlak a tih thu sawiin, health minister a nih angin ngaihdam a dil a nghe nghe a ni.
Hemi chungchang hi nimin Assembly session-ah pawh hmeichhe MLA pahnih bakah house member thenkhatin pawi an tih thu leh an tawrhpui thu an sawi chhuak bawk.
He thil thleng atang hian, damdawi ina thawk thenkhat hi chuan, mihring nunna chhanchhuak tura damdawi chungchang zira damlote chhanchhuak tura damdawi ina thawk an ni tih hi an hre lo thei dawn hle mai tih a lo lang thei a ni. Khawlaia nau hring, damdawi in panpui ta chu, thi leh dam kara leng a ni tawh a, khum a awm leh awm loh lam a ni lova, a theih ang angin an lo bawihsawm phawt tur a ni a, chu chu an tihtur leh an mawhphurhna a ni tih hi an hre lo hle tihna a ni. Hetiang thil hi a thlen nawn tawh lohna turin, thuneitute hian hma an lak nghal a pawimawh hle a ni.