Civil Hospital Laboratory Feedback/Complain

Civil Hospital, Aizawl hnuaia Department of Pathology chuan, damlote tana hna an thawh danah, fakna emaw sawiselna/lungawilohna emaw neite tan “Laboratory Feedback/Complain” sheet an siam a. He feedback/complain sheet-ah hian duhthlan tur point 10 dah sa niin, a chhannaah hian duhthlan tur pathum heng – ‘|ha’ ‘Pangngai’ tih leh ‘|ha lo’ tih hi thai (tick) tura tarlan a ni. A tawpna ber point 10-naah chuan, “Rawtna leh sawiselna i neih te:” tih dah a ni a. Chutih laiin heng chhanna sheet thehluhna tur bawm (box) erawh chhawpchhuah a ni hran lo a, thisen lakna room-a counter pakhatah theh luh mai tura ruahman a ni.
Tuna Civil Hospital-a thisen lak dan te, a lakna hmun te, thisen lakna room te hi sawisel tur a awm hran awm lo ve, a aia tha leh nuam zawkte chu awm thei se, duhthusam a ni a, mahse “A tha pangngai” tih mai loh chu, hmun dang han thlakna tur hmun awl a awm miau si lo. Staff ten damlote an dawnsawn danah pawh, sawisel tur em em a awm hran lo. Laboratory fai leh fai loh chungchangah pawh, a hmunhmain duhthu a sam miau loh avangin ‘a pangngai’ tih mai tur niin a lang.
Point 10 chhawpchhuah zingah hian ‘Report chhuah hun hi’ tih a tel a, mahse ‘thisen lak hun’ tih erawh a tel lo. Thisen lak hun hi a tlai avangin thisen test result chhuah hun pawh tlai dar 2-3 leh a hnu lam te a ni thin a, test result en tur doctor an lo awm tawh loh thin avangin a tukah tha tharin doctor pan a lo ngai leh a, doctor thut hun a lo inthlak ve reng bawk nen, thingtlang khaw hla zawk leh, Aizawl veng tlabirh deuha awmte tan chuan buaina leh harsatna a thlen nasa em em thin. Chu chu thuhran, natna enkawl ran ngai deuh bikte tan a lo tlai duai thei bawk a, hei hi chu hospital enkawltute hi a hrethiam hlei hlei tur an ni.
Rawtna awm thei ta chu – Thisen lak hun hi zingkar dar 7 velah ni se, pawisa pekna counter pawh a inhawng hma ve mai ang a. Thisen test result hi chawhnu dar 1 vela tihchhuah hman a nih chuan doctor ten an en vek hman thin ngeiin a rinawm. Test result pekchhuah dan pawh hi, hming lam loh loh reng ngai lova system felfai taka tih theih niin a lang.