RK Dawla
Mb 9366095658
-- Advertisement --
1. 2025 kumthar Pathianin min hruai thleng a. Eizawnna pêng chi hrang hrangah mahni hma tê tê kan buaipui tan hlawm a. Tropical farming-a kan buaipui ber thin hnim pawh, a tlêm lai hun niin, thlasik boruak ro vanga leilung kaihhnawih thlai harsatna hluar hun lai a ni thung. Thlai kumhlun chingtu te, thlasik thlai leh kumkhat tlangram loneitute chenin sik leh sa leh leilung intuahrem dan hian kan hmakhua a hril thui hle a. Tuia leitha daha thlai chin (Hydroponics) leh Bâwm chhunga Boruak hnâwng uap hmanga thlai chin (Aeroponics) a nih ngawt loh chuan, kan thupui hmasa tur chu leilung hi a ni lo thei lova. Kumin chhovah hian leilung behchhana thlai chin, tlo leh daihrei zawk mai ni lo, hlâwk zâwka farming kalpui dan tur kan zir chho leh dawn a ni.
2. Thlai kan chin dawna pawimawh hmasa chu kan thlai chi quality kha a ni phawt a. Tunlaiin Company thlai chi siam (High yielding variety) a lo chhuak tam hle mai a. Heng Hybrid thlai kan tih maite hi a chi (seeds) atanga tihpun lehchhawn chi an ni chiah lo deuh a. Chutih laiin, natna leh rannung do theihna kawng thenkhatah kan tualto thlai chite aiin that bikna an nei thin a, rah chhuah hlâwk kawngah pawh an chhuanawm deuh tlangpui thin.
Amaherawhchu, leitha an heh bikin châwm an hautak zawk a. Chubâkah, tualto thlai kan chin thinte aiin kan leilunga hrik awmsate nên an thawkho tha lo zawk thung. Hei hian hmun ngaia ching reng turin harsatna tam tak a thlen thin. Thei lam chi-ah pawh chi hnih – leilung dana inthlahchhawng (Indigenous variety) leh Mihringte thiamna hmanga thlahpawlhtir kan hmelhriat thin ang. Engpawhnise, thei lam chite hi a chi (seeds) atanga inthlahpuntir hi thlai chi hrang pâr inthlahpawlh (cross-fertilization) vangin a kungpui (motherplant) nihphung ang diak diak rawn chhuak lo a awm fo thin. Hei vang hian, a kungpui zar (stem), zung-puak leh mit (bud) atanga tihpun hi a suak meuh lo thung.
3. Mizote hi thlai chi vawnthat kawngah kan la hniam hle mai a. Thlai chi tha siamchhuak tura hmun khata chin khawm lam hi kan la var-pawh lo rih viau a. Entirnan : Mai-ban chi kan ching a, a mual lehlamah a ban lo chi kan tuh leh thova. Heti a nih chuan, khuaiin a par an bawmpawlh vangin, a chi kan khawm hunah mai ban chi kha a ban lo nên a inpawlh leh ta tho tho thin. Vaimim chite pawh kan ching hrang ve bawk a, a chi tha siamchhuak tura Greenhouse chhunga chin hran ang chi a nih loh vangin, a chi kha a hlir (pure) tak tak thei thin lo a ni. Mi ramah chuan farm pakhatah thlai chi khat, variety thuhmun si lo kha ching kawp lovin, a hlangin an ching a. A par hunah chi dang nen an inthlahpawlh loh nân a bikin an enkawl thin a. Hei vang hian, variety tha bik thlai chi siamchhuakin, man to bik takin thlai chi an hralh chhuak thin. Tin, thei kung a nih chuan, kolom, stem-cut, budding, grafting leh a zung puak hi a suak thei lova. Thei kung hrisel tha, rah tam leh natna fihlim kha a chi atanga tihpun an pumpelh hrâm hrâm thin a ni. Thei kung, nihphung tha tak nei, hrisel tha leh rah hlâwk tih chiang tawh ngei kha a chi atang ni lovin an tipung a, chutiang chu chin pun chhunzawm zel atân a tha bik a, buaina tam tak an pumpelh phah thin. Keini chuan, kan hriat ngai loh thlai danglam deuh chu, “A chi min lo khawl teh” kan ti liam mai a. A kungpui hrisel dan, rah chhuah dan, rah hlawk dan leh danglam bik dan kha kan chîk tel lo fo thin. Helai tak hi kan hmasawnna rahbi thar tur niin a lang. Thlai nihphung hi a chi nihphung chhungril (genetics) lama danglam awlsam a nih vangin, thlai kumhlun ho chu a chi atanga tihpun hi uar lutuk lo ila, a him ber âwm e. A suak (a kungpui nihphung ang chiah nei lo) a chhuak sam êm êm a ni.