CLIMATE SMART, SUSTAINABLE FARMING – 31

RK Dawla
Mb 9366095658
1. August thla kan thleng ta a. Jhumm farmer tam tak tân chuan, Lo zawh thla kan thleng ta reng mai. Kangvar vaimim a châr tan a, fanghma a tài mêk a, antam ilo a rah tan bawk. Sik leh sa rum lutuk hun ni mah se, khaw awmdan avangin kan tuar nêp thin a, ruah phingphisiau leh chhûm zîng chiai chiaiin hmun a chang tam a. Lui tuilian a fîm tan a, aiâwt chiah leh sangha man hun tha a inher chhuak mêk bawk. Lo leh huana hlo tung tam berte chu an pâr dawn tan mêk a, hlo chhehkhawm nun duh hun tak a ni mêk bawk. Fur tantira thlai/thei phunte pawhin chawrno an rawn chhuah thar tan a, favang chawr rûnpui nang turin an inbuatsaih mêk a. Mizoram sik leh sa nawm ber hun lai, thlasik hun nuam tak kan hnaih chho hret hret a. Chutih laiin, luipui kam behchhana Nûl-huan siamtute pawh favang thlai ching turin an inbuatsaih chho mêk bawk. Anniho tân erawh Favang awllen tihte chu…Teuh lo mai! An tûl êm êm zawk a, kumkhat hunchhunga an tul ber hun a inherchhuak tan mêk zawk a ni.
2. Leilung enkawla a harsa lai ber, hnim enkawl leh sawngbawl hun tha a inher chhuak mêk a. Ram lum, ruahtui tamnaah kan awm a, hnim kan ngah êm êm thin. Pa tam tak, nu tam tak chuan, hnim vangin kan huante kan enkawl hneh lo fo thin a. Chuvangin, hlawk zawk, awmze thui nei leh himdam zawka hnim buaipui kan thiam a tul hle. Hnimte hi an tawih chuan, leitha siam nâna hmanraw tha ber an ni a. Kan chhehvela hnim tinrêngte hi leitha siam tura uptawih tlâk vek an ni a. Chan sawm thuak thuak a, thil ro – hnahthel tla ro/buhpawl/thingzai phuai nen chawhpawlha uptawih chuan, kan thlaite châwmna tur leitha engemaw zat hi kan intodelh thei a ni. Tin, hnim buaipui tak tak tur chuan, khaw awmdanin a zir a ngai a. Chutiang atân chuan Favang hi hun nuam leh remchâng ber a ni âwm e. Thlasik a lo thlen tak tak hi chuan, hnathawhna turin khua vawt nuam mah se, hnim chawrno a tlêm tawh thin a. Duh ang hnim lâkkhawm a harsa deuh thin a. Chuvangin, kawngkam a ni emaw, in bul vel leh huan/lo hnim pawh nise, uptawih hun tha ber favang kan thleng chho mêk e – lo inring rawh le!
3. Hmun dang atangin leitha chi hrang hrang, kan thlaite enkawlna turin kan lei thin a. Mahsela, kan neihsa atanga mahni intodelh tumna kan nei tlêm thin a, hei vang hian tharchhuah man a tam a, kan thlai tharchhuahte quality a tha tâwk lo thin. Kan hnaivai hmanruate hmang tangkai a, mahni hman tur leitha kan insiamchawp theih hian a sustainable ber! Kan tualto hnimte atanga leitha siamchawp kan uar hma chuan, kan Zoram riangtê hian engtikah mah smart/sustainable farming hi kan ban pha ngai lovang! Tin, ran vulhtute pawhin, kan ranchaw ningnawi, zun leh êkte kan uptawih theih chuan, nasa takin sum leh pâi bâkah, lei thatna kaltal tur kan hum thei dawn a. Ran zun-êk leh chaw ningnawite hi kan thlahthlam chuan, pollution siamtu, natna hrik bupui leh rimchhia mai an ni a. A changkang lo êm êm. Hei hi ran vulhtute zawng zawngin kan var-pawh a tul takzet a ni. Hêng bâkah hian kan choka ningnawite chen hian, kan ran leh thlaite chawmna tur engemaw zat kan phuhrûk thei cheu a. Thil awmsa, hman theih nghal maia innghah ringawt hi a sustainable lova, hlawkna a tluantling thei thin lo. Vai leitha leh damdawi hmang ringawta intodelh kan tum a, rinrawla neih kan tum chhung chu kan hmakhua a êng tak tak lovang a, sik leh sa lo danglam zel lakah kan vulnerable reng ang. Chuvangin, rilru thar nên, thui zawk leh tlo tur ngaihtuah takzetin farming kan hmachhawn a tul chho takzet e.