CLIMATE SMART, SUSTAINABLE FARMING – 34

RK Dawla
Mb 9366095658
1. Natural farming hi Organic farming emaw Sustainable farming tiin kan sawi thei ang a. Central sawrkar pawhin a hlutzia hriain a uar thar êm êm a. Kan Mizoramah pawh Dept leh Agency kaltlangin hmun thenkhatah hma lak tan a ni a. Tunlaiin mi changkang leh fing apiangin organic hmang thlai tharte ngaihsan nachâng an hria a. Rampawna thawnchhuah (export item) turah phei chuan organic ngei hi duhthusam number 1 a ni. Chutih laiin, Green Revolution atang khan Indian farmer leh Agri University thlengin chemical farming kan uar êm êm a, kan than-hnan hial bawk a. Degree sâng tak tak nei, agri/horti mithiamte pawh, organic farming-ah hi chuan, an chuti lutuk lo fo thin. A awm pawh a àwm viau. An zirna laimu ber a nih miau loh avangin, dem lutuk theih lohna chin a awm a. Mahsela, a basic science ber man tawh tân chuan, organic-a transform leh pawh harsa lutuk àwm lo tak kha a ni ve thova. Tuina tak tak leh tumna tak tak awm loh vang mai mai a ni zawk àwm e. A chhan pakhat chu, kan Horti/Agri degree khan huan siam, loneiha eizawn kan tum tlat lova, sawrkar hna kan êm tlat vang a ni. Hmun thenkhatah phei chuan, BSc (Agri/Horti) kha English Medium zirtirtu-ahte an han tang leh lâwp lâwp a! Farming lama naupangte rilru kaihruai hriam turin an tha phian mahna le!
2. Veiawm êm êm thin chu, kan politician atanga dept mithiam thleng hian, ramdanga an system kha zirchiang hmasa lutuk lovin sengluh phêt kan tum a. Mau kan ngah êm êm a, kum tin kan vât a, kan hâl fê chung pawhin kan la tirêm thei lo a nih laiin, foreign mau, thangkhat lian tawp kan han tuipui tlat maite hi ât khat chu a chêng deuh a ni! Phai khawlum tih hriat ngawih ngawihah, Greenhouse-te kan han sa tak ang uaih uaih a! Mi vantlang chhia leh tha hriatna atang ringawt pawhin, Tunnel system a tha zawk dawn tih a lang reng mawle….thin a! A hautak lo zawk daih lehnghal a, a flexible-in zonu/zopa kutke a mil zawk daih lehnghal! Kan project tam tak hi chu, sum siam nân chauha duan hi a ang fo mai! Farming lama kan hmalakna hrang hrangah pawh hian, farmer-ten anmahnia an insiam chawp theih reng leitha siamtir lam ai chuan, sanjivani compost tih vel kan han supply nghek thla ngawt a! Kan formula atang hian suatainable rim a nam thlawt lo mawle! Kan ram a lum tawk chauh a, thil titawih theitu hrik kan ngah tehreng nen, hnim uptawihna tur NATURE VEL tih vel kan han supply leh chiam a! Nature Vel-in titawihtu hrik a kente hi kan ramah an tam êm êm a, kan kawtkaiah an vâk huai huai reng sia! A châng chuan heng project-te hi mithiamte kutchhuak a nih ka ring lo rum rum thin! Computer Engineer hian farming project siam ta se, farming knowledge leh background nei lo ta chuan, siamsa leitha supply hi bilh tel ta se, a hriatthiamawm viau ang. Mahse, chutiang a nih hmel si loh.
3. Khaw khata taima fâl leh hmunhma nei tha deuhte hi bêl lo ta se, kan Agri & Horti Dept hi chu an mualpho nasa ve ngawtin ka ring thin. Kan system hi a dik lo a ni. Mithiam thahnemnghai tam tak an awm, mahsela a thiltitheiah an tang si lova! Horti officer thahnemngai tak hmelhriat ka nei a, a thawhpuiten an ngai thei thak lo! A bâng ta daih a, a tak takin farming-ah lûtin huan a siam daih! Khatiang mithiam zawk khan ram an chawikang ang, sadaiêk ham pherh chu sawi loh, a hriat pawh hre lo, university chhulchhuakho hian ram tân thil ropui tak an hlen tunge ring ang le? Beisei hi a sâng fa lua thei lo a ni! Kan ramin hma a sâwn kan duh tak tak a nih chuan, kan ram leilung leh sik leh sa awmdan sa milin, chêt kan la ang a, farmer-te potential zirchiang leh upgrade hmasa-in project kan khawih ang, tichuan rah tha a chhuak ang. Hei hi Mizo tawh phawt chuan, kan kan hre kar tur a ni e.