CLIMATE SMART, SUSTAINABLE FARMING – 35

RK Dawla
Mb 9366095658
1. ‘BER’ thla kan chuangkai tan a, khua a favang tan ta tak tak e. Perhpawng leh khauchher chi hrang hrang an vanglai chho chiah bawk. Thlai tiak tir seh chhum an chin avangin, khaute hi zan lama monitor peih a hlu êm êm. Seedbed kan siam a nih phei chuan, shadenet/thosilen etc hmanga khuh/tuam/hung a tangkai hle. Ni a satin a sa rum êm êm a, khua a dur pawhin a lum uap êm êm tho. Boruaka hnâwng a la tam (high relative humidity) tihna a ni e. Ni a sa emaw khua a dur emaw pawh nise, ruah kan do a nih ngawt loh chuan, hna thawh hlekin a lum uapin thlan tui a luang zawih zawih thin. Hetianga thlan tui far zawih zawiha hna thawh hi anchhia emaw kan ti fo thin a. Mahsela, malsawmna zawk a lo ni. Thlantui far zawih zawiha hna thawh theih hi hrisel nân a tha takzet a. Taksaa thil tul lo awm tur tam tak a inpaih chhuak a, chaw ei a tuiin, min tiharhvang thin. Zunthlum rau rauah, stage inang rau rauah pawh, thlan tlaa hnathawk mi chu an danglam a, an chhelin an fit bik thin. Thlan (sweat) atang hian taksaa thil chhia tam tak a inpaihchhuak tur a ni a. Hei hi hriselna leh damreina atân a hlu êm êm. Tin, thau chhia inchhekkhawl tur leh BP sâng tur venna tha tak pawh, thlan tlaa hnathawh hi a ni fo. Chuvangin, thlan tlaa hnathawk theite hi mi vannei leh hamtha, mi awhawm kan ni zawk e – tunlai khawvelah chuan.
2. Kan sik leh sa a danglam zel a. Hun bi neiin ruah a sur mumal lo chho zel a, thâl na lutuk leh ruah bawhawk uchuak kan tawng tam telh telh dawn a. Hetiang sik leh uchuakah pawh, survive a, surplus thei tur chuan, patlingin beng sika kan ngaihtuah fê a ngai ta. Sustainable farming atân hian farmer a pawimawh ber a, a dawtah leilung, environment leh kan thlai chinte. Theihna inang rau rauah pawh, farmer’s mentality azirin thil a danglam thei êm êm. Pawimawh ber, pawimawh fo tur chu farmer rilru puthmang hi a ni. Farmer tam tak chu leilungah hian kan bazaar zawk zawk hi a ni ber a. Tlona leh nghehna kan thlûk thiam lutuk lo. Rilru-a chenchilh leh awmhmun nghet ben bel erawh thil dang daih a ni. A thuhrimin, Farming-a Mizote kan hniam chhan lian tak pakhat chu kan huan/farm/field kan awmchilh lo hi a ni. A hranpaa feh a ngai a, operation hrang hrangte kha a hmunah ni lovin, in lamah, khumlaizawl atanga kan suangtuahna atanga kalpui a ngai thin hian harsatna tam tak min thlen mêk a. Ram intodelh, tharhchuak tam, ram awhawm ni tur chuan kan farm field-te hi ‘ràlkhat atanga vil’ mai lo deuh hi kan mamawhin a lang. Kan hmunhmate awmchilh hian rukru ilovah himna a siam mai ni lovin, thlaiten kan kutke an mamawh hun takah kan chêt chat char theih phah a. Hei hi a hlu êm êm.
3. Tlo leh hlawk zawka farming kalpui tak tak tur chuan, thlai chin leh nungcha dangte khawi/vulh tel hi a kalkawp a ngai viau zel a. Ran chi hrang hrang vulh, khuai khawi leh sangha khawi etc nêna thlai chin thiam hian, resource hrang hrang a kalkual chaktir a. Hman tangkai theih thil luangral mai mai tur a titlêm a, rimchhia leh bawlhhlawh insiam tur a vêng tha êm êm. Vawk leh Bawng farm siamin ram hla leh hmun fâl kan pan hrâm hrâm a. Changtlung takin farm kan kalpui tan a, an zun-êk rimchhia leh tenawm tak a chhuak tam telh telh a. Pawn lam atangin kan ranvulhte mamawh kan chawlut tam telh telh bawk a. Hetiang system-ah hi chuan, hlawk turin a hautak êm êm thin. Ran zun-êk kha ran ei tur fodder chin nana hman tangkai a nih erawh chuan, senso tam tak a phuhrûk bâkah ran hrisel zawk, thlai hrisel zawk kan tharchhuah phah thin. 5G internet khawvelah kan chen mêk lai hian, kan farming system-ah erawh bul tan dan tha leh awmze nei kan mamawh êm êm e.