CLIMATE SMART, SUSTAINABLE FARMING – 47

RK Dawla
Mb 9366095658

1. December thla kan thleng ta. Thlasik vanglai a ni mêk a, leilunga nitrogen tlem lai leh hnawng kalral chak hun a thleng tan mêk bawk. Chuvangin, seasonals thlai chingtute tân, nitrogen tamna leitha leh tui pêk kawp thiam a hlut vanglai tak a ni ngei ang. Hei bakah hian, boruak ro (low relative humidity) vanga leilung khawro tiziaawm tura thlai bul khuh (mulching) a tangkai hle bawk ang.
2.Kan India ram, khawvel mihring tamna ber hi a hrawkhrawl a chak tih US hian a hre ràn a. Hei vang hian India ramah Bekang, Vaimim leh Bawnghnute rawn thawn luh a châk êm êm. Mahsela, Gujarat, UP leh Bihar farmer-ten an tuar nasa mai dawn si a, hei vang hian India sawrkar hian a remti ngam ngang si lova. Tichuan, US titau chuan tariff tisâng leh Russia crude oil chhuanlamin India a hrêk ta thin. A nihna takah chuan an thar tam bawnghnute, bekang leh vaimim thawnchhuah an duh zawk a ni. Gulf countries leh Europe lamah India hian agri products thawnchhuah tan lâk a tum ngial nâ a, an lo duhtuiin an duh khirh êm êm a. Non-processed (perishable goods) an lalut dawn a nih chuan, GMO crops leh chemical farming products an lo iai bawk si a. Helai tak chingfel tur hian Organic farming chawi lar chhoh tumin, Natural Farming Mission kalpuiin, sum leh pai tam tak a vawm ta ruih ruih a. Gulf leh Europe ramte hi Developed Countries an ni a, ei tur duhtui viau mah se an afford thei tlat a. Chuvangin, organic product thawnchhuak turin a si ruk la-in India a insingsa ta mup mup mai a ni.
3. Kan Mizoram dinhmun thlir ang. India state dangte aiin infrastructure engkimah kan hnufualin kan harsa zawk a. Chuti chunga India nawlpui thar theih thlai, Conventional technology hmanga kan lo thar ve viau hian (kan state chhunga kan ei ral tur bâk kan thar chiam hian), keini aia tharchhuak man tlawm thei zawkte hi market-ah kan hneh thei dawn lo. Saruh hersawm (bonemeal) mai mai pawh India chhim tawp Kerala aiin a lêtin a to zawk a. Kan ram zîm tê, mechanised theih hmunhma tihtham nei lo atang hi chuan, India nawlpui thar theih loh kan thar theih dan awmchhun chu Organic farming hi a ni. Heti lamah hian tan kan lâk a ngai hle. Sawhthing, Hmarcha leh Aieng pawh hi hmunhma ngaiah organic hmanga thar tura zirchianna kan neih a tul hle. Chakai farm enchhin nân pawh nuai 60 chuang kan hmang ngam a, ram hnuk khawih ngawih ngawih thlaite zir chian nân hian kan hmang ngam ve tur a ni dawn lo’m ni?
4. Hachhek tlangdungah kuhva a lar êm êm. Kolasib district-ah pawh an buaipuina a rei tawh viau. Tuirini kam kuam velah pawh an ching uar tan. Environmentalist thenkhat chuan an ngaimawh tan viau a, a dikna chen a tam ang – kan intihhmuh zel si a. Chutih laiin, kuhva plantation pawh hi sustainable leh eco-friendly deuha kalpui dan tur hi zawn chhuah a tul hle. Tuna bit taka kuhva chauh kan phun tlur ang chi hi khawvel lo kal zelah a him lohna tur tam tak a awm thei. Kum 20 liam taa kuhva natna leh hriselna issue leh kumin chu danglam tawh tak a ni. Kum 20 lo awm leh turah phei hi chuan, a chuti mai mai tawh hauh lovang tih a chiang. Sawrkar pawh hian Research/Experiment ti tur hian Dept mithiamte kutah chauh ni lo, private farmer-te kutah pawh rinna nghat ngam sela a tha hle. Subject-a tui mang lo, exposure nei mumal bawk si lo, khawi lai University degree rawn nei tha satliah ringawt ang chi hian kan ram an tidanglam tam lo chu a nih hi. Kolasib Chakai Farm nuih tiza pawh kha sawrkar kan dem ngawt a, sawrkarin a rawih mithiamte zawk kha an hlawhchham a ni zawk lo’ng maw?