CLIMATE SMART,SUSTAINABLE FARMING – 29

RK Dawla
Mb 9366095658

1. July thla tâwp kan thleng a. Chhûm zîng chiai chiai leh ruahsur cherh cherh hun lai a ni a. Boruak leh leilungah hnâwng a tam a, nisa a tlêm avangin thlai tiak leh puitling tawh pawh, lâwng (blight) natna-in a tibuai ve duh êm êm. Sawhthing tâm, buh nâ, ba lài etc zawng zawng hi tun ang hun atanga rawn hluar chho thin a ni. Leilunga tui inthlihul tha lo te, thlai bi zing lutuk te, thlai mal khat chauh chin tlur te hian tun ang khaw lum leh hnâwng tam, ni êng tlêm si-ah hian natna an paw chhuak sam thin a. Heng natna vanga harsatna hrang  hrang lo thlengte hi damdawi hmanga vên emaw tihdam tum ngawt chuan, a harsa êm êm a, a hautak hle bawk. A lo thlen chhante ngaihtuah ràn khian, a hma lama invenna leh inbuatsaihna kalpui a tul thin. Farming-ah chuan rîk phut a, hma lâk thâwr ai chuan, zir chian leh chîk hmasak a tul hle thin. Hei hian harsatna leh hlawhchhamna tam tak lakah min vêng thin e. 
2. Sawhthing, hmarcha chin kan intihhmuh hluai a. Ngaihtuah chiang lêm lovin kan invest nghek a. Tihfuh loh hlauhawm tak dinhmunah kan din phah a. Sawhthing leh hmarcha chin uar dawn rêng rêngin, khât deuh takin buh thar tlai chin tel thin a tha. Buh hi 3-5ft danah a tâwk êm êm. Buh chu cereals a ni a, kum khat thlai zingah chuan a chhel ber chi an ni. Hei vang hian thlai chhel lo chi fruit crop (hmarcha) leh root crop (sawhthing) nena chinpawlh khan, Zopa tawngkam takin, an indamdawi tawn a ni. Hetia chin pawlh hi chuan, natna lo vei pawh nise, a darh ve puk puk lova. Enkawl (hlo thlawh, thlai rah seng, rihvûr etc) buaithlak deuh mah se, a pumpuia thlir khan a hlawk zawk tho tho thin. Hlâwkna tlo leh kumhlun (sustainable harvest) nei tura tan kan lâk thiam poh leh mi buainaah kan buai tlêm a, mi harsatna tawh ang kan tuar tlêm zel ang. Kan sik leh sa hi tunhma ang kha a ni tawh lova, a danglam nasa tawh êm êm. Sik leh sa danglam nasa hian leilungah leh thlaiah hlet a rawn chhuah a, chu chu kan tuar mêk a, kan tuar zel dawn bawk a ni. Hei vang hian survive a, sustain a, surplus tur chuan, kan inhuam thui a ngai chho hle dawn a ni. 
3. Farmer hlawhtling tam tak kan hmu thin a, kan hmu mêk zel bawk a. Heng zinga a tam berte laka duhthusam ka lo neih thin chu sustainable mindset hi a ni. Entirnan : Vawkvulh hlawhtling chuan company feeds leh a rem rem khawn khawmin vawk a vulh nghek a. Chutih laiin, a zun êk sawngbawlna lam uar a ni lova, rimchhia leh tenawm tam tak a chhuak tel a. Ran leh mihring hriselna khawih pawi thei thil hrisello a chhuak teuh thin. Tin, a chaw leh mineral supplement atân company product kan ring ngar ngar a. A hlawk tur angin a hlawk lo fo. Mahnia vawk chaw thar ve tumna a tlêm fova. Vawk zun-êk kha process ni sela, chu chuan mahni eitur thlai leh vawk chaw tur thlai chawmna mai bâkah, hralh chhuah tham leitha a tharchhuak thei reng a. Hei hi mi tam ber hian kan var-pawh rih lo niin alang. Bawng vulhho zingah pawh hei tho hi mi tam ber case a ni tho. Kan hlawhtlinna kalkawngah thil hrisel lo, pollution kan hnutchhiah zel chuan, kan hlawhtlin poh leh midangte tân kan hnawksak dawn tihna a ni a. Hei hi sustainable mindset leh sustainable practice hmanga kan hmachhawn a ngai a, kan tunlai khawvelah hian a tul tawh tlat a ni. Engpawhnise, saihlum pakhata sava pahnih perh thla tur chuan, extra time-ah extra work kan khawih tel a ngai a. Chu chu a changkang a, ram leh hnam tân a hlu a, a promising êm êm e.