Club WC final zanah president Trump an boo khum!
Club WC final zanah president Trump an boo khum!
Kum 2026 World Cup thlengtu ram pathum zinga a khaipa ber tur United States leilungah Fifa hnuaia club hrang hrangte inelna chu khelh niin, New Jersey khawpuiin Pathiania Fifa Club World Cup final a thlen tuma a hmuna inkhel entu langsar ber US president Donald Trump chuan lawmtu leh dodaltu a neih inzat thuak awm e!
Chelsea laka sithum faia Paris St Germain an sawpna inkhel kha US, Mexico leh Canada-te inthlentawm tur 2026 World Cup khuhhawnna hmasa ni pahin, MetLife Stadium, East Rutherford, New Jersey-ah US president ngeiin a telpui a, ‘boo’ khum a hlawh thum hum hum laiin amah lawmin mipui sang tam takin thawm duhawm lam an chhuah (cheer) ve bawk.
Inkhel en laiin Trump leh a nupui Melania Trump chu VIP suite-ah FIFA president Gianni Infantino leh a nupui Leena Al Ashqar-te nen an thuho a; US national anthem an sak laiin khelmual chhunga an TV lian (jumbotron)-ah a lo lang a, tah chuan mipui tam takin thawm inpawlh nuak nuak chu he president avang hian an chhuah ta a ni.
Inkhelh bana trophy ceremony lai pawhin khelmual chhungah referee Alireza Faghani leh match referee dangte nen thla an laho a, hetih lai pawh hian fans lam atangin ‘boo’ thawm bawk a rawn richhuak leh a, organiser lamin thawm mawi lo hliahkhuh turin stadium chhungah ring zawkin music an play phah ringawt!
President Donald Trump hian Chelsea captain kutah an tro phy dawn hlanin, player-te nen thla an laho bawk.
TV interview-ah Trump hi tunge footballer piang chhuak tawh zawng zawng zinga thiam a tih ber an zawt a, soccer GOAT atan chuan Brazilian icon Pele hming a lam chhuak a, North American Soccer League club pakhat New York Cosmos tana kum 1975-a lo khel ve zawk tawh Pele chu thiam ber tura a ngaih thu a sawi.
Broadcaster DAZN hnenah president Trump chuan, “Pele inkhel hi ka en tawh a, a thiamin a duhawm takzet a, ropuiber min zawh chuan ani hi ka kawk mai ang,” a ti.
MetLife khelmuala a inlan tur thu hi New York khawpuia Trump Tower chhunga Fifa-in office thar an hawn atanga ni khat liam hnuah president Trump ngei hian a puangzar a; Club World Cup final an khelhna hmun tur MetLife Stadium hi nakkum World Cup final an khelhna hmun tur a ni nghe nghe.
Kumin February thlaa Super Bowl pawh a hmuna lo chhim tawh Trump hi Club World Cup bakah nakkum Fifa tournament lian zawk an thlen leh tur atana taskforce an dinah chairman a ni.
Fifa lam hian Miami khawpuiah office bun tho bawk mah se New York khawpuia in ropui Trump Tower ngei maia office thar an bun leh chhan pawh US administration nena thawhhona tha zawk neih chhoh zel an beisei vang a ni.
Fifa president Gianni Infantino pawhin US sawrkar leh president kaihhruai White House taskforce atanga Fifa Club World Cup leh nakkum Fifa World Cup an huaihawt leh tur chungchanga thlawpna an dawn that avangin lawmthu a sawi.
Trump hian a term hnihnaah pawh sport chi hrang hrang nena inzawmna a lo nei tawh thin a, sitting president zinga Super Bowl chhim hmasaber niin, tunhma lam khan wrestling-ah a hmel hmuh tur a awm thin.
UFC event hrang hrang pawh chhim tawhin, thla hmasa mai khan New Jersey khawpuia show lianah pawh a tel a; nakkum hian White House-in UFC event a thlen tur thu a puang tawh bawk.