Club World Cup draw a chhuak
Team 32 inelna ni tawh tura an tihlen tak Fifa Club World Cup group stage-a intum tur pawh fel niin, group khatah defending champion Manchester City leh Italian giants Juventus an awm dun.
Tarlan tawh thin angin, a hmaa khawmualpui champion-te inelna ni thin kha nakkum atang hian 32-team tournament-ah an let dawn a, tualchhung, Europe leh international kawtkai thlenga player-te’n chetchhuahna tur an ngah em em laia Fifa lamin club-te inelna lian zawk a duangchhuak hian sawisel pawh a hlawh viau reng a ni.
Nakkum nipui laia khelh tur tournament hi 2026 World Cup inthlentawm tur ram pathum – United States, Mexico leh Canada-a khelmual 12-a khelh kual tur niin, June ni 15 atanga July 13 thleng a awh dawn a, 2026 World Cup ‘rehearsal’ a ni deuh ber dawn.
Group stage draw hi Italian World Cup winner leh Juventus great ni bawk Alessandro Del Piero chuan Miami, Florida-ah a kaihruai a; he hunah hian FIFA President Gianni Infantino tana US President-elect Donald Trump-a message thawn chhiarchhuah a ni.
Tarlan tak angin, Premier League champion Manchester City chu Juventus, Wydad AC leh Al Ain-te nen Group G-ah an awmho.
Lionel Messi khelhna Major League Soccer club Inter Miami chu Group A lamah awmin, Arab team ve bawk Al Ahly nen opening match an khel ang.
Club World Cup hnuhnungber kum 2023-a khelhah Manchester City an champion a; Etihad club hi player hliamin a tibuai hle a, Spanish midfielder leh Ballon d’Or winner ni bawk Rodri tela an player pawimawh an inhliam phung avangin tualchhung league lamah pawh beisei an pha lo a, Premier League table-ah palina an ni pha chauh a ni.
English top-flight title vawili la zawn thei City hian an match hmasaberah Wydad AC an tum dawn a; group stage hmawr an bawknaa Juventus an hmachhawn hmain Al Ain an khel bawk ang.
Cuban-American singer leh eight-time Grammy Award winner ni bawk Gloria Estefan chuan Ningani zan draw-ah Manchester City tum turho hi a pawt a ni.
European champion Real Madrid chuan Group H lamah Al-Hilal, Pachuca leh Red Bull Salzburg an tuam kual dawn a; hetih lai hian European giants dang Bayern Munich chu Group C lamah Auckland City, Boca Juniors leh Benfica-te nen an awmho thung.
Vawithum ngawt European champion ni ve tawh Inter Milan chu Group E-ah River Plate, Urawa Red Diamonds leh Monterrey-te nen an khungkhawm a; kumina a zawna French top-flight title vawithum latu Paris St Germain chu Group B-ah Atletico Madrid, Botafogo leh Seattle Sounders-te nen an intum kual ang.
Brazilian club Botafogo hian karliamta mai khan a vawikhatna’na Copa Libertadores title an lak avangin Fifa Club World Cup khel tura ticket hnuhnungber an chang ve hram a ni.
London club Chelsea chuan Group D play lamah Leon hmachhawn chungin bul an tan dawn a, Flamengo leh Esperance an su zui leh ang.
Group F lamah Fluminense, Borussia Dortmund, Ulsan HD leh Mamelodi Sundowns-te an intlarho ve bawk.
-- Advertisement --
Fifa Club World Cup 2025 draw
Group A: Palmeiras, FC Porto, Al Ahly, Inter Miami
Group B: Paris St-Germain, Atletico Madrid, Botafogo, Seattle Sounders
Group C: Bayern Munich, Auckland City, Boca Juniors, Benfica
Group D: Flamengo, Esperance Sportive de Tunisie, Chelsea, Club Leon
Group E: River Plate, Urawa Red Diamonds, Monterrey, Inter Milan
Group F: Fluminense, Borussia Dortmund, Ulsan, Mamelodi Sundowns
Group G: Manchester City, Wydad, Al Ain, Juventus
Group H: Real Madrid, Al Hilal, Pachuca, Salzburg