CM dawt sawi nasa hi ruling MLA thekhatin hreawm an ti – Robert Romawia

On Mar 24, 2026 3 0

CM dawt sawi nasa hi ruling
MLA thekhatin hreawm an ti
– Robert Romawia
Chief minister-in dawt a sawi nasa lutuk chu ruling MLA thenkhatin hrehawm an ti niin MNF MLA Robert Romawia chuan a sawi.
Thawhtannia Mizo Hnam Run-a inkhawmah MNF adviser Robert Romawia Royte hian, ZPM party awm hma chuan Assembly Session-ah House leader, minister leh MLA ten dawt sawi an hlau hle a, dawt sawi hriat tur a vang tih a sawi a. Tun sawrkarah chuan dawt sawi a tam em em a, an din lai ngeia tihdikna siam ngai pawh a awm hial, tiin, chief minister leh a nauten Assembly House pawh zah zo loa dawt an sawi nasa lutuk chu ruling MLA thekhatin hreawm an tih thu an sawi hial niin a sawi.
CM-in an tihthat vangin SASCI ah lawmman an dawng nia a sawi chu dawt a ni tih sawiin, lawmman dawn niloin central duhdana reform siam vanga sum puk belh phalna mai a ni tih a sawi. SASCI chungchangah India ramah a titha ber pali-na kan nih thu CM-in a sawi thin chu dawt bawk a ni, tiin, “SASCI-ah khawi level-ah mah ranking pek a awm lo. Pakhatna an awm loa, pahnihna an awm loa, 17-na pawh an awm chuang lo. CM hian hmun thenkhata a dawt sawi hi amah bawkin a awih leh a, a thutak sawi zui hmiah hmiah zel niin a lang,” a ti.
ZPM chu an opposition laiin sum puk chungchangah ‘mipui min dahkham’, ‘kan puk ve dawn lo’ titein an sawi thin tih MNF MLA hian a sawi a. An han sawrkar a, a puk theih zawng zawng an puk nia sawiin, “tun Session-ah pawh thil thleng ngai lo leh thil awm theiah pawh ngaih loh a thleng a. Chu chu kan budget aiin kan leiba a tam zawk kha a ni. MNF sawrkara thleng nise, ZPM hi an nasa ngawt ang,” a ti.
Chief minister Pu Lalduhoma’n a bial chhung Thenzawlah state capital sawn rawtna sawrkar laipuiah ziakin a thehlut a, sum pawh dilin an hmu tih a sawi. “Mizoram capital Thenzawla sawn hi Aizawl mipui hian an duh ka ring lo. ZPM MLA pakhat phei chuan Assembly Session-ah Aizawlah eng thil thar mah awm tawh lo se a duh thu sawi a. Hetianga Aizawl dah pawnlang leh ngaipawimawh lo hi AMC-ah sawrkar tir chi an ni lo,” a ti.
AMC chu India rama urban local body tha ber pawl, hmarchhak bikah phei chuan an entawn ber niin MNF hruaitu hian a sawi a. Dawt nena phuahpawlha ram leh hnam pawi tam tak khawihtute chu AMC-ah sawrkar tir ngam chi an ni lo tih a sawi a ni.