CM eirua puh chhiat danah ZPM Thalai-in hmalak dan ngaihtuah

On Feb 19, 2026 1 0

CM eirua puh chhiat danah ZPM
Thalai-in hmalak dan ngaihtuah
Chief minister Lalduhoma eiru nia ngaih theiha puh chhiat a tawh danah hma lak zui dan tur an ngaihtuah mek tih ZPM Thalai chuan an sawi.
ZPM Thalai Hqrs. thuchhuak chuan, tunhnaia chief minister interview atanga a lan danin, Indian Air Force-in Lengpuia ram lak a tum danah Article 371G leh Mizoram Land Revenue Act kalhin MNF sawrkar leh IAF thui takin an lo indawr tih a chiang tih a sawi. Mizoram Land Revenue Act-in a phut ang chuan, IAF (non-tribal ) hi land lease (ram hawh) hmanga ram lak tir tur a nih laiin, MNF sawrkar khan tribal-ten ram kan inlei chhawn dan –outright purchase anga ram lak tir a lo tum a ni tih document hrang hrang atangin a langchiang tih a sawi a ni.
2023 inthlanpuia ZPM-in sawrkarna a chang chu Mizoram leh a leilung fate venghim tura Pathian remruatna ni ah a ngai tih sawiin, ZPM sawrkar chuan IAF leh MNF sawrkar indawr dan a hriat veleh dan angin, outright purchase chu land lease-ah a thlak a, Lengpui leh Sihphira IAF ram bakah MNF hunlaia non-tribal hrang hrang leh state sawrkar lo indawrna dang pawh chhuichian a tul hle ni ah a ngai tih a sawi bawk.
Lengpui leh Sihphir rama IAF-in ram a lak danah corruption nasa taka a inrawlh rinna Mizoram mipuiah a len avangin CBI-ah complaint a lut a. ZPM sawrkar chuan an sawrkar tirhah CBI hnenah general consent a pek tawh avangin an tan hnu chhuiah harsatna a awmlo tura ngaih a ni tih a sawi.
‘DSPE Act 1946 hnuaia general consent-in a huam loh, state chhunga sawrkar hnathawkteah dan bawhchhia an lo awm a nih pawhin, chief minister-in consent pek a nih tur thu a lo sawi tawh a, Mizoramah corruption a tlem zel theihnana hma la thin chief minister Pu Lalduhoma kan nei hi a thlamuan thlak hle,’ thuchhuah chuan a ti.
Hetih lai hian, tunhnaiah MPCC adviser Pu Zodintluanga’n CM corrupt ber anga a sawi leh, MPCC vice president Pu John Rotluangliana’n IAF ram lak chungchangah, ZPM pawhin sum siamna atan an hmang, tia a sawi bakah ‘chiang taka kan hriat thawi danin kan CM hian a chan tur chu vaibelchhe 14 a ni a, vaibelchhe 10 a chang ta zawk a, rangkachakin min pe rawh u’ a ti e, an ti, a tih thu sawichhuakin, ‘He inpuhna hi ZPM Thalai chuan pai daih harsa a ti hle a, hmalak dan tur a ngaihtuah mek a ni,’ a ti.