CM hovin buhhum lei dan tur sawiho October a\angin Card var tan buhfai Rs 30/Kg

Mizoram State Government Paddy & Rice Procurement Committee chu nimin khan Chief Minister Lalduhoma hovin CM Office-ah an thukhawm a, Mizorama buh chingtuten hlawk zawka buhhum an hralh theih dan tur an ngaihtuah a, an lo zirchian tawhna behchhanin ruahmanna an siam.Handholding Scheme nena kal kawp turin sawrkar chuan Mizoram thar chhuah buhhum-ah support price a pe dawn a. A bultan nan kuminah Kolasib leh Mamit district ah kalpui phawt tur a ni. A kalpui dan tur kimchang hi vawiina Hand Holding Scheme hawnnaah puan a ni ang.
Meeting-ah hian Ration Card var neitute hnena subsidy rate thar kumin October thla atanga Mizoram puma kalpui tan a nih tur thu FCS&CA minister B. Lalchhanzova chuan a sawi a. Sawrkarin Card var tana subsidy Rs. 25 a pek thin chu thla thar October atangin Rs. 10-a pek tan a nih tur thu leh, Mizoram pumah Card var ho tan buhfai khul man Rs. 30/Kg a nih tur thu a sawi a. Hei bakah hian, October thla atang vek hian Retailer-te lawmman pawh kg khata duli ni thin chu chengkhat leh duli-ah tihsan a ni tawh ang, a ti a; Retailer zawng zawngte buk dik taka mipui hnena buhfai pe chhuak turin hriattir an ni, a ti bawk.