CM-in agent thiam lohvah puh

Hmunphiah hralh chungchanga harsatna thleng mekah chief minister-in he harsatna hi sorkar thiam loh a ni lo niin a sawi.
“Kan agent-te thiam loh a ni mai,” a ti a, “Keini thiam loh a ni lo a,” a ti bawk.
February ni 21 khan governor address sawihonaah a hmawrbawktu-ah tangin house leader Lalduhoma, chief minister-in hmunphiah hralh chungchang hi a sawi a, agent thiam lohvah a puh.
“Kan lei thei ang in rate ang hian an ti a, ngaihthain kan awm a, an thei leh si lo a, kan tuar tlang a ni ber mai hei hi chu,” a ti a, “Chuvang chuan, keini thiam loh a ni lo a, in thiam loh pawh a ni lo, kan agent-pa thiam loh a ni ber mai,” a ti bawk.
Hetih lai hian hmunphiah hmun nei, harsatna an tawh mek chungchanga biakpawhte chu sorkarin rate a siam vanga harsatna tawkah an inngai a, rate tha sa reng kha a tlakhniam phah an ti. Sorkarin hmunphiah ro kg-ah Rs 80 emaw Rs 100 emaw aia tlawm lova lei a ni ang a tih avangin a leitu mazon-te’n chumi mil chuan rate an siam niin an sawi.
An thlir dan chuan, a hring kg 3 hi an pho rovin Kg 1-ah a chhuak a, pho ro turin hmunhma tha a ngaih avangin a hringa hralh hi an duh zawk si a, tichuan mazon-te’n keini lo chu lei tur an awm chuang lo tiin, a hring kg-ah Rs 30 te, Rs 25 tea lei an tum ta a ni. Sorkarin a ro Kg-ah Rs 80 leh Rs 100-a lei a tum chuan, a hring kg 3 hi Rs 30-a an leiin Rs 90, Rs 25-a an leiin Rs 75 a ni ang a, sorkar rate siam ang vel leh chu aia hniam pawha lei an tum ngam ta niin an hria. A ro hun nghak lovin a hrin laia hralh an duh zawk dawn tih an hriat avangin, mazon-te hian an duh ang tawkin rate an siam ngam tih chu an hmuh dan a ni.
Hmunphiah ngah khua Vairengte-ah chuan February ni 18 khan Rs 25 atangin Rs 15-ah a tla a, hmunphiah hralh tur neite an mangang hle.
Nikum December ni 13-a term thara session hmasa berah khan governor address-ah tun financial year-ah la la hian sawhthing, aieng, hmarcha leh hmunphiahte sorkarin a lei nghal dawn tiin a lo sawi tawh.