CM-in khawchhak unaute a duhsak thar ta em em hi hriatthiam a har – Lal Thanzara

Chief minister Pu Lalduhoma chuan khawchhak unaute a duhsak thar ta thut niin Congress president Lal Thanzara chuan a sawi a. Hetihlai hian Zampui tlangdung unaute erawh ration card atangiun a paih leh si niin a sawi bawk.
Zirtawpnia Congress Bhavan-a inkhawmah MPCC president chuan, chief minister-in khawchhak unaute a duhsak thar ta em em mai chu hriatthiam har an ti a, chutih laiin kan unau Zampui tlangdunga awmte chu ration card atangin a paih leh si, tiin, “Hei hi bana kaih policy chu em ni? Kan Unau Zampui tlangdunga awmte khuan hei hi mak an ti a, hei hi em ni kalphung thar chu an ti a ni,” a ti.
Chief minister chuan an sawrkarah minister-te leh MLA-te chenna in chei a ni ve dawn lo, tiin sawi mah se, an sawi loh angin an chei nasa em em tih a sawi. Sawrkar chu sum leh pai lama a pachhe em em mai chu thil mak a ni tih sawiin, “Tunah hian ICU-a ventilator hmanga nung hram hram ang a ni,’ a ti.
Congress chu District Council petu, UT petu leh state-a hlangkaitu a nih bakah state thenawmte el pha leh anmahni ang dinhmuna din tirtu chu Congress a ni tih Lal Thanzara hian a sawi. “Rambuai kum 20 kan tuar a, remna leh muanna thlen nana thawktu chu Congress a ni. Mizorama hmasawnna lian zawng zawng hi Congress sawrkar laia thleng a ni,” a ti bawk.
MPCC vice president C Ngunlianchunga, MLA pawhin ZPM chu a sawi chu an sawi mai a, a taka chet an ti hleithei loa, an sawi leh an thawh a inanglo tih a sawi. Ruang phurh chungchangah, oil man an tisang bawk nen, sawrkar rate siam angin ambulance neitute an tlan duh dawn lo tih a sawi.
“Hmanniah Health minister ka bia a. Ruang phurhna rate an siam hian ambulance neitute an tlan duh si loa, engtin nge an tih dawn tih a zawt a. A hriat tawh bik loh thu in min chhang,” C Ngunlianchunga hian a ti. “Ka hrelo, an ti fai vek mai a, mahse an hotupa ber chuan ka minister-te chu an inzirthiam tawh a ti. Tuna kan sawrkar hi enchhin mek, ‘enchhin sawrkar’ an ni a. Mi thil hre lo ten an la tan hle a, hun a kal anga, an chan hi a chhe telh telh dawn,” a ti.