CM-in khua sawn a rawt

CM-in khua sawn a rawt
Chief minister Lalduhoma chuan Neihloh khua chu a khaw hmun a ngheh tawk loh avang leh a zauh hleihtheih chuan si loh avangin khaw thar kai mai se a that zawk a rin thu a hrilh.
Serchhip bialtu MLA Lalduhoma hian a bial chhunga awm Neihloh khuaah hian Inrinni khan YMA Day a hmang a. Thu a sawinaah Neihloh chu khaw lian ni lo mah se, a chhunga cheng mipui an inngeih avangin a nuam hle tih a sawi. Chutihlaiin a hmunhma in duhthu a sam loa, a him tawk loa, a zauh hleihtheih tawh bawk si loh, tiin, “In khaw ram chhungah hian khaw thar kai mai ula a thain ka ring. Sawrkar nena tangruala ngaihtuahna thar sen mai tha in ka hria,” a ti.
Chief ninister hian Thenzawl leh a chhehvel ram thuta Peace City din tuma hma a lak dan pawh a sawi a. Master plan an siam thuai dawn a, a tak a chan hunah chuan Neihloh khawtlangin an chhawr hle dawn tih a hrilh a ni.
YMA Neihloh Branch-ah hian member 262 an awm a, nikum YMA Day leh kumin YMA Day an hman inkarah member thi pahnih an nei.
Tunhnai ruahsur nasa vang khan Neihloh hian chhiatna a tuar nasa hle a. Rei tak chhung khaw panna kawng a ping a, chenna in engemawzat a chhia a, khaw tuilak a chhia a, tanky awmna a him lo bawk. YMA Hall leh library pawh leiminin a hnawh avangin YMA Day hi Primary School-ah an hman phah a ni.