CM-in PM leh Manipur CM phut thu sawi “Ngawih chuh hun a ni ta lo e!”

CM-in PM leh Manipur CM phut thu sawi
“Ngawih chuh hun a ni ta lo e!”
Manipur-a thil thleng chungchangah, tun hnaia video clip darh chungchangah chief minister Zoramthanga’n instagram leh twitter-ah rorel tura prime minister leh Manipur chief minister a phut thu a sawi a, “Ngawih chuh hun a ni ta lo e!” a ti.
Manipur-a nunrawng taka chetnain ram pum a nghawng tiin a sawi a, “Manipur-a kan Vaiphei hmeichhiate chunga nunrawnna lantirna video darh chhuak hian min tithinthawngin min deng na hle mai a. Video-a kan hmuh zahmawh thila inbeihna hi zahngaihna tel lo nunrawng taka chetna uchuak, zahthlak tawpkhawk leh mihring chunga nunrawnna lantirna demawm tawp a ni. Manipur buaina chinfel leh tihtawp hlen dan kawng ngaihtuah hi a tul tak zet tawh a, a tihtawp dan ngaihtuah theitu tur pawh sorkar laipui chauh a ni,” a ti.
“Ka sawi nawn leh duh chu – Manipur buainaah hian mi tam takin nunna an chan tawh a, thisen tam tak a luang ral tawh a, hliam tuar leh sahimna zawnga hmun dang pan mi tam tak an awm belh zel bawk a, chung zingah chuan ka chipui Zo hnahthlak tam tak an tel a, kan chipuite tawrhna chu kan tawrhna a nih miau avangin ngawihsan theih a ni lo!” a ti bawk.
Buaina chinfel dan kawng awm apiang dapa a rang thei ang bera ngaihtuah a ngaih thu a sawi a, “Chu chu mawhphurhna la ngei ngei tura ngaihte mawhphurhna, Manipur sorkar leh sorkar laipui te tihmakmawh pawh a ni a; a rang thei ang bera remna leh muanna kawng zawn hi an kova innghat tlat a ni. Chuvangin Manipur chief minister Pu N Biren Singh leh prime minister zahawm tak Pu Narendra Modi te pawh a rang thei ang bera hmalakna nei nghal tur leh pawikhawihtute man chhuak a, dan hmaa rorelsak thuai turin ka phut a ni,” a ti.
Chief minister hian Mizo tawng leh English-in a ziak a ni.