Envrionment chhiatna vanga Loneitute tawrhna

By Lalhlupuia

Kum tina Loneituten ruah leh thli lo hawn dan dungzuia thlawhhma kan neih a, kan lo inrinlawk ang kha tunah chuan kan Environment chhiat tak zel avangin a lo danglam zo ta.
|huang-ruah, |o-ruah, Ruahthimpui, Nikir-ruah, Ai-ruah, Pawldelh-ruah kan tih thinte pawh mumal takin an sur tawh ngai lova, Hunbi neia ruah sur thin, ni sarih daih thinte pawh kha a rawn sur ve a nih pawhin ni hnih-thum bak an sur tawh ngai lo. |o-thli kan tih te, Sirukla kan tihte pawh an thaw tawh ngai lo zuk nia.
Kan Environment chhe zelin a rawn hrinchhuah zinga ngeiawm tak leh nakin lawka buaina lian tak min thlentu tur chu Ruahtui tla a tlem hret hret hi a ni. Kan naupan lai, ti ve khanglang ila, khang hunah khan Champhai Leilet zawl hi Hectare 900 vela zau niin an sawi thin a, kum 3 vel lek kalta khan Revenue Department-a mi thiamten Buh an chinna ram zau zawng an teh chiang a, Hectare 630 zen zawnah chauh buh chin a ni tawh an ti. Chumi awmzia chu, ruahtui tla a tlem hret hret avangin tui hmu tha thei lo leilet zawl, buh chin theih lohna ram a pung chho zel a, buh chin theihna ram chu a zim hret hret tihna a nih chu.
Tunhma lamah khan Champhai leilet zawlah hian May thlaah buhchi kui tiakin, June thla chawhma lamah buh an phun zo tlangpui a, kum engemawti atang khan May thlaah buh chi kui thei lovin, June thlaah an kui tiak a, July thlaah an phun tlangpui ta a, kuminah phei chuan buhchi kuina tham ruah tlem azawng rawn tlaah June thlaah buhchi an kui a, July thla chawhnu lam thleng hian Loneitu tam takin tui an hmuh that loh avangin buh an phun thei ta lo hial a ni.
Champhai zawl chhehvel hi ramngawin a hual lai, Sasua leh Khawthli bakah thing chang tha tak takin a hual vel lai kha chuan Furah ruahtui a tlakin, Champhai zawl hi ruahtuiin a chim lawk lo va, thing hmunah hun rei fe a inthlitfim hnuah chauh fim takin tui a rawn luang lut thin a, chu chu leilet chawmtu tha tak a niin loneitute tan hmun hrang hrangah tuitaiput te lo awmin, buh hmun chawmtu tha tak an ni thin.
Mahse, tunah chuan Champhai leilet zawl leh a chhehvel chu tunlai hmasawnna avangin nasa taka tihchhiat a ni a, ruah a surin hmun tin atangin tuihawk nu tak Champhai leilet zawlah luang lut nghalin, hnawl leh leivung tam tak a luang lut a, hmun tam tak chu haifai hleih theih loha awmin Leilet tam tak chu hnawlin a chim chhia a, tuihawk nu takin Champhai zawla tuipui lui finin, Greater Champhai Water Supply hnuaia Tuipui lui, Champhai khawpui chawmna tura an tuilak chu nasa takin a nu a, Tui pump theih loh chang a tam ta hle a, Furah tui nu nasa avangin harsatna an tawk a, |halah tui hna tlem avangin duh khawp tui pump tur an nei lo va, hei hi kan Environment chhe zelin a rawn thlen thil tha lo tak chu a ni.
Champhai District-a leilet zau tak tak awmna, |iau lui kam, Ngur khaw rama Zilhri phai te, Hnahlan rama Lali phai te, Sesih leh Bulfekzawl ah te pawh kawrte tui ringho chuan tun July thla chawhnu lam thleng hian buh an la phun thei lo va, Minor Irrigation Dept.in tui an lak sak ring thenkhatin buh an phun theih laiin Irrigation channel chhia avanga harsatna tawk thahnem tak an awm mek bawk a ni.
Ruahtui tla a tlem a, Tuitai put tur a awm thei ta meuh lova, Leilet neitu tam tak chuan buh phun thei lovin tlai khawhnuah Vaimim te an leileta ching turin an inbuatsaih ta ringawt a ni.
Heng harsatna lo piang chhuak ta hi kan Environment, thing leh mau kan tih chereu nasat vanga lo thleng a ni ngei ang. Khawvel pumpuiin harsatna a tawh mek ang hi keini kum tina ngawpui thiata, hal duai duai a, thlawhhma kawng zawh thinte hian kan tawk chho ve mek a, chuvangin, thing phun a, humhalh a, a puitlin theihna tura hmalak leh kan neihsa, thing leh mau humhalh kawngah tan kan lak zual sauh sauh a ngai ta a ni e.