CM leh NGO-ten ramri hung, FMR leh raltlan an sawiho

CM leh NGO-ten ramri hung,
FMR leh raltlan an sawiho
Chief minister Lalduhoma chuan Inrinni khan NGO Coordination Committee hruaitute a kawm a. Myanmar ramri hung, Free Movement Regime leh thildang an sawiho.
Chief minister chuan Mizoramin tlawmngai pawl tha tak tak kan neih chu mite thilpek leh thawhlawma innghat ngawt loa, mahnia inenkawl thei tura lakluh nei zawnga an awm theih tha a tih thu a sawi a. Ruahmanna duang turin a chah.
Mizoram sawrkarin Myanmar ramri hung chu tha a ti loa, free movement regime (FMR) pawh tha takin awm reng se an duh tih a sawi a. Tuna ramri chu British sawrkarin ‘divide and rule’ policy hmanga min barhluih ramri a ni, tiin, “Unau min thenhrang a, kan hnam lian tak min pawtdarh a, pawm theih a ni lo. Kan hmathlir leh duhthusam chu rorelna pakhat hnuaia awm a ni reng zawk,” a ti.
Tunhnaia Delhi-a tum hnih a zinnaah Union Home minister a hmu ve ve a, minister dang pawh a hmu a, an hnenah kan dinhmun a hrilh tih Lalduhoma hian a sawi. Myanmar ram dinhmun hrilhin Manipur lam chu an hung a nih chuan kan sawi phak a niloa, Mizoram erawh hung a rem lo, tia a thlen thu a sawi.
“Min lo dawnsawn dan ka ngaihtuahin thlamuang takin kan awm thei niah ka ngai,” a ti a. Sawrkar anga hmalakna leh NGO anga hmalakna an neih a, an tih tlan zel tha a tih thu a sawi.
FMR bik chu, ralthuam leh ruihhlo tawlhrukna a tam em avang ni mah zawka a lan thu chief minister hian sawiin, “Hemi thu ah hian kan border security infrastructure tihhmasawn hmasak a tul thu ka thlen a ni,” a ti.
Heng bakah hian raltlan chhawmdawlna chungchanga sawrkar laipui a dawr dan pawh hrilhin, tanpui tura an inhuam thu an sawi chu a tul angin an bawhzui tih a sawi.
Chief minister hian engemaw duhlohna lantira punkhawm leh thiltihah lim inhalsak chu awm lo hram se tha a tih thu leh Kristian tihah chuan a mawi chiah loa a ngaih thu a sawi a ni.
NGO Coordination Committee chairman Lalhmachhuana chuan sawrkar tharah a tha zawnga thil inthlak an hmuh chhoh zel avangin lawmthu a hrilh a. NGO-ten ramri hung an duh lohna leh FMR hlih an duh lohna tilang tura punkhawm huaihawt an tum dan, chutiang lam ngaihtuaha an thawhpui Nagaland lama NGO ho pawhin hma an lak ve mek thu leh palai an tirh thute hrilhin, an thil phut chu sawrkar laipui leh Mizoram sawrkar hnena ziaka an thlen tawh thu a sawi a ni.
Heng bakah hian Bangladesh lama Zohnahthlakte harsatna tawh mek, Manipur atanga raltlan chungchang leh thil pawimawh dang an sawiho a ni.