Coaching leh PE trainer atan thawh ho dan tur sawikhawm
Coaching leh PE trainer atan
thawh ho dan tur sawikhawm
Sawrkar laipui Ministry of Skill Development & Entrepreneurship (MSDE) hnuaia Sports, Physical Education, Fitness and Leisure Skill Council (SPEFL-SC) chief executive officer Tahseen Zahid chu February 18 & 19 khan Aizawlah rawn kalin, minister Lalnghinglova Hmar nen SPEFL-SC kaltlanga Mizo thalaite tan sports leh skill kaihkawp dan tur an sawi dun.
MSDE hnuaia SPEFL-SC kaltlang hian sports kaihhnawih job role 41-ah training theih a ni a. India ram hmun hrang hrangah Training Centre neiin mi nuai 41 train tum a ni. An job role zingah a bikin sports coaching, physical education leh fitness trainer te chu Mizoramin a mamawh tih hriain, LESDE leh Sports minister Lalnghinglova Hmar chuan Union minister for Skill Development and Entrepreneurship Jayant Chaudhary leh MSDE secretary Atul Kumar Tiwari te a lo sawipui tawh a. Rawtna pawh MSDE-ah thehluh a ni.
Union minister leh secretary ten Mizoram sawrkar leh SPEFL-SC chu indawr chhunzawm tura an lo rawn angin leh, Mizoram Sports minister-in a sawm angin SPEFL-SC CEO hi Mizoramah a rawn kal a ni.
Thawhtanni tlai khan Lalnghinglova Hmar leh Tahseen Zahid hi inkawm a. Thawhlehni khan Labour, Employment, Skill Development & Entrepreneurship department leh Mizoram State Sports Council official-te telin thawhho dan tur an sawi leh a ni.
Thawhho tum dan tlangpuiah, nodal department atan LESDE ruat, training partner atan Mizoram State Sports Council hman te a tel. Vision 2036 Olympic nei chunga kalpui tur ‘Bana Kaih Empowering Mizoram Sports’ a trainer turte tan ‘Training of Trainers’ kalpui leh, school hrang hranga zirtirtute tan physical education training neih a tel bawk.
SPEFL-SC CEO hian Mizoram Sports minister-in zin tura a sawm chu lawmawm a tih thu a sawi. Mizoram proposal thehluh chu tihhlawhtlin ngei an duh tih a sawi. MSDE leh SPEFL-SC kalphung awmsa mila her rem hret hret ngai lai sawiho a, a hlawhtlin theihna tur ngaihtuahin Mizoramah a lo zin tih a sawi a ni.