Coldplay-in No.1 album 5 nei ta

Coldplay-in No.1 album 5 nei ta
Coldplay chuan an album thar ‘Moon Music’ an tlangzarh ta a, Billboard 200 (albums) chart No.1-ah a debut a, an album chart top 10-a lang thei 10-na niin, an album No.1 kai thei pangana a ni bawk. Coldplay hian an album hmasa Ghost Stories (2014), Mylo Xyloto (2011), Viva La Vida or Death and All His Friends (2008) leh X&Y (2005) te chu No.1 an lo kaipui tawh bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Moon Music’ hi a kar khatnaah 1,20,000 an hralh thei a, chunga zinga 1,06,000 chu album tak tak hralhna niin, streaming atangin 13,000 (on-demand official stream maktaduai 16.71) leh album-a hla mal hralhna atangin 1,000 a tling thei bawk.
Coldplay hi British group zinga Billboard 200 chart-a No.1 kai thei album ngahah palina niin, Beatles (19), Rolling Stones (9) leh Led Zeppelin (7) te an pha lo a, Pink Floyd leh Wings nen No.1 kai thei album panga theuh an nei.
Sabrina Carpenter ‘Short n’ Sweet’ chu 93,000 hralh lehin, kar li a No.1 (a zawn lovin) hnuah No.1 atangin No.2-ah a tawlh a, Chappell Roan ‘The Rise and Fall of a Midwest Princess’ chu 56,000 hralh lehin No.2 atangin No.3-ah a tawlh a, chart No.1 hlui Morgan Wallen ‘One Thing at a Time’ chu 50,000 hralh lehin No.4-ah bawk a la awm a, Billie Eilish ‘Hit Me Hard and Soft’ chu 50,000 tling lo deuh hralh lehin No.5-ah bawk a la awm.
He chart a No.1 lo kai tawh album pathumin dawtin, Taylor Swift ‘The Tortured Poets Department’ chu 45,000 hralh lehin No.7 atangin No.6 a kai thar leh a, Post Malone ‘F-1 Trillion’ chu 43,000 hralh lehin No.6 atangin No.7-ah a tawlh a, Future ‘Mixtape Pluto’ chu 40,000 hralh lehin No.3 atangin No.8-ah a tawlh ta bawk.
Noah Kahan ‘Stick Season’ chu 37,000 hralh lehin No.8 atangin No.9-ah a tawlh a, chart No.1 hlui Morgan Wallen ‘Dangerous: The Double Album’ chu 32,000 hralh lehin No.10-ah bawk a la awm.