College of VS&AH hmalakna tur thlirlawk

11th College Extension Advisory Committee (CEAC) chu College of Veterinary Sciences & Animal Husbandry, Central Agricultural University, Selesih Aizawlah Nilaini khan neih a ni.
Thutkhawmah hian CVS&AH thawhpui Mizorama line department – MzSRLM, ICAR (NEH), MULCO, NABARD, KVK Selesih College faculties, self help group, ran vulhtute leh loneitu aiawh an tel a. Kum khat (2025- 2026) chhunga he college-in line department tan, self-help group, ran vulhtute leh loneitute tana an hamthatna tur leh hmalakna tur, a bikin training chi hrang hrang, field visit, animal health camp leh thil dang thlirlawk a ni.
External expert atan NDVSU Jabalpur director (Extension Education) Dr Sunil Nayak leh ICAR for NEH Region Mizoram Centre Kolasib joint director Dr Sunil Doley chu endiktu tura sawm an ni a. CAU Headquarter atangin director (Extension Education) Dr Dipak Nath a tel bawk. Kum khat atana College hmathlir endikin an pawmpui a, thurawn an pe a ni. Farmer aiawhtu (representative) atan CAU Council member (Extension Education) Dr David Tlaisun Thawmthanga leh SHDF Foundation neitunu Lalthangmawii chu social worker aiawhtu (representative) niin an tel bawk.
CVS&AH dean Dr Lalnuntluangi Hmar chuan college dinhmun a sawifiah a. Nasa lehzuala tanho chuan Mizo mipui loneitute leh ran vulhtute an pui thei ang a, an dinhmunin hma a sawn chhoh zel a beisei tih a sawi a ni.
CVS&AH Department of Veterinary Extension Education head Dr Saidur Rahman chuan kum 2025-2026 a college hmalakna a report a, kum 2026- 2027 atana college hmachhawp leh department hrang hrang nen an thawh ho theihna tur kawng an sawiho.
CEAC thutkhawm hi kumtin CVS&AH CAU Selesih hian a buatsaih thin a. Kum khat chhunga hmalakna tur leh kum kaltaa hmalakna enlet thin a ni.