College zirtirtu atana tling pha lote an turin MSU-in sawrkar an ngen

College zirtirtu atana tling pha lote an turin MSU-in sawrkar an ngen
University Grants Commission-in college zirtirtu atana a phut ang tling pha lo, tuna zirtirtu hna chelh mekte chu sawrkarin an hun a pawhsei sak zel tih Mizo Students’ Union chuan an sawi a. Qualify lo chu chhawr chhunzawm loin, midang a lo chawlh tir tawhte anga chawlh tir turin an ngen tih an sawi.
MSU Gen. Hqrs. president B Lalkhawngaihzuala sawi danin, hun rei tak atang khan college zirtirtua part time-a thawk tur assistant professor lak zingah UGC-in a phut ang NET/Ph.D nei lo lak tel an ni zauh zauh a, sawrkar pawhin hrethiamin, ban leh mai loin NET/PhD an neih hun nghakin ‘chance’ a pe thin. Covid len lai atang khan mumal taka hmun khata lak awm loin, mahni college-ah theuh Higher & Technical department aiawh tel thlapin mi 146 vel lak an ni hman a, lak an nih hnua MET/PhD nei hman an awm nual tih a sawi.
2025 February 28 khan zirtirtu (casual teacher) qualify ngeiin an thawh theihnan sawrkarin huaisen taka hma la in a chhawr chhunzawm tawh loa, hetihlai thleng hian qualify lo chhawr chhunzawm hi mi 32 chauh an awm tawh tih a sawi a. February vek khan casual teacher lak thar niin, hetah hi chuan qualify chauh dil theih a ni ta tih a sawi bawk.
Hetianga sawrkar hmalaknaa an lawm viau lai hian, kumin February 21 khan H&TE department chuan part time asst professor 29, UGC-in a phut ang nei lo (qualify lo) chu 2026 February 28 thleng thawk chhunzawm tura hun a pekna lehkha a tichuak tih sawiin, “Vawi tam chance pek hnu pawha qualify thei lo chu sawrkar pawhin ban ngam turin kan ngen a. Casual teacher-te laka huaisen leh rualkhai taka hma a la ang hian, duhsak bik nei loa rualkhai taka thutlukna siam turin sawrkar kan ngen a ni,” MSU president hian a ti.
Sawrkarin chhawr zawm tura pawmpuina a tihchhuah tawh pawh chu sut turin an ngen tih a sawi a. Hmalakna a awm lo a nih chuan thui zawka pen zel turin an inpeih tih a sawi a ni.
Zawhna chhangin MSU hruaitute chuan, college zirtirtu atan hian qualify ngei lak tur an awm nual tih an sawi a. Tuna an ngenna hi chief minister leh H&TE minister hnenah ziakin an thehlut tih an sawi.