Supreme Court leh High Court judge ruat danah sorkar nen inbakkaih tia sawi chu hnawlin Union Minister of law and Justice Kiren Rijiju chuan Collegium system chu kenkawh zel a ni ang a, Parliament-in dan siama kalpui dan thar a siam a nih ngawt loh chuan hman chhunzawm zel a ni ang a ti.
-- Advertisement --
Minister chuan mi thenkhat ten Chief Justice of India (CJI) hnena lehkha a thawna a thusawi te a ni lo zawngin an la a ni a ti a. Constitution Bench chuan chiang takin judge te ruatna kawngah sorkar leh Collegium te chuan Memorandum of Procedure chu lungrualin an siam tha mai tur a ni, a ti a.
“Law Minister ka nih angin Constitution Bench thupek hi zawma kalpui mai tur ka ni a. Mi thenkhatte hi chuan kawng engkimah buaina an hmu a, harsatna an siam thuai thuai mai a ni. Collegium system a awm chhung a, a thlakna tur siam a nih loh a, Parliament in thlak tumna a neih loh chhung chuan Constitution Bench turemna anga kal mai tur a ni a. Kei ngei pawhin CJI be rawnin hma ka la tawh a ni,” tiin Minister chuan a sawi.
Executive, judiciary leh legislature chu thawhho that a ngaihthu sawiin minister chuan democracy ah chuan institution amah maiin a kal thei lo a ti bawk a.
“Mi ten institution amah chauha kal theia an ngai a nih chuan mi mawl rama cheng a ni ngei ang. Society a thil hrang hrang te a hran bika awm thei an awm lo. A kimchang hre si lo hian mi thenkhat ten sorkar thil tum leh kalpui dan te an pawngpaw sawisel thin a, heng te hi institution ti chhe thin zawk a ni” tiin a sawi bawk.
Democracy tha taka a kal nan chuan “Judiciary independence a tul a, tihmakmawh a ni a. Legislature leh judiciary chu ram tana thawk an ni. Mahse, thawhhona tha a awm loh chuan India hi ram ropuiah kan siam thei dawn lo. Kan ngaihdan a dang daih tihlam a ni lo va, kan thawh dan kalhmang a in ang lo va, kan tum erawh thuhmun a ni. Thuneihna neih chin tur te chu Constitution ah chaing taka tarlan a ni” tiin a sawi bawk.