By Dr J.T.Vanlalngheta
Alumnus,
Gov’t Mizoram Law College
-- Advertisement --
Singapore-a chengte chhungkaw awmpui ‘foreign domestic worker’ (FDW) ni tura kan farnute kal an intihhmuh tak deuh hi kum 15 emaw vel emaw kalta kha a ni tawh ang. A tir lamah khan tunlai angin a thawntu bik private placement agency an la awm mumal loh vang emaw, an awm tawh tih hriat loh vang emaw a ni ang a, Burma/Myanmar khua leh tui anga inchhal a, Burma passport hmanga kal kha an tam viau tawhin a rinawm.
Tunah chuan Singapore, Macao, adt-a FDW atana hmeichhia kum 18 chin thawnna lam buaipuitu private agency hi Mizoramah hian an awm ve nual tawh a, chuvangin Burma a lo buai ta bawk nen, Burma passport hmanga kal hi chu an awm ta meuh lo vang tih a rin theih. Eng pawh ni se, Burma chuan tualchhung buaina a nei emaw nei lo emaw, India khua leh tui nihna anga India Passport hmang ngeia kal hi a thain a him a; tin, foreign a ni emaw ram chhung (Mizoram pawn)a kalte en zui (monitor) a awl zawk avangin placement agency rintlakte behchhana kal chhuah hi a tha ber tih hriat tur a ni. India ram pawnah hian a hmunah interview an hmachhawn leh a, chumi hmunah chuan passport-a khua leh tui leh tawng an ziah lan ang khan thil an zawt leh thin a, India ram chhung/Mizoram atanga kal lote kha chu an buai khawp mai niin an sawi; chu achhapah, an rawn haw leh duh hunah a buaithlak hle bawk a ni. Myanmar ram buai karah eng emawti takin Myanmar khua leh tui angin awlsam taka kal leh theih pawh ni se, kal reng reng loh hi a him ber a ni.
Singapore a ni emaw Malaysia a ni emaw, Macao a ni emaw Mizoram pawn (India ram chhung) leh foreign-a inhlawh kan duh a nih pawhin, uluk takin ngaihtuah thin ila, mobile phone-a in-contact mai mai atang hi chuan kal lo ila; tin, kan fanu/laizawn/farnute pawh agency hriat chian lohte thawn chhuahah dah lo ngam bawk ila. Hei hi Mizorama khua zawng zawng hian hria ila; khaw chhung hotute, eg YMA/VC/LC emaw angte hian Committee dinin, an khu/veng atanga Zoram pawna inhlawhfa tura chhuah tumte hi an hriatpui mai pawh ni lovin, an rem tihna tel lo chuan kal theih loh ni hial se a tha ang. Hetianga kan tih chuan Mizoram hi human trafficking-ah pawh eng emaw chen chu kan him phah ngei bawkin a rinawm.
Human trafficking lam chu hlauhawm lovah lo ngai tehreng pawh ni ila, Burma passport-a kal, tuna Singapore-a hna thawk mekte pawh hi an la awm a, engtin nge an rawn haw ang tih hi ngaihtuah tham tak a ni tho mai.
Mizorama Sawrkara Home Department chuan kum 2017 daih tawh khan Sawrkar ni lo, mi mal emaw pawl emaw, ei zawnna lam thila thalaite thawn chhuak thinte khuahkhirhna dan ‘ The Mizoram Private Placement Agencies (Regulation) Rules, 2017’ a siam a. Ram danga hna thawk turte thawn chhuahna lam buaipui hna (business)a nei turte dilna format, hna thawh tumtena chutianga anmahni buaipuitute hnena an dilna theh luh tur ‘dilna format’ te leh form dang neuh neuh nen, he hna dan hi vai phek chhiara phek 15 vela chhah a ni a. He dan a awm atang hi chuan a hma ang ngawt chuan placement agent nih chu a awlsam tawh lo vang. He hna dan (rules) siamtute pawh hian an phuah uluk hle tih a hriat a. Agency nih tumtena dilna an theh luhna leh dan an bawh chhiat thulha an lisence pawh cancel theitu atana thu neitu pawh ‘authority’ emaw ‘competent authority’ emaw ti mai lova ‘controlling authority’ an tih kher hian awmzia nei hle tura ngaih a ni. Tin, hetiang business ti tur tena thu neitu (CA) hnena an theh luh hnuah, chutiang business an neihna tur hmuna District Superintendent of Police (SP) chu an dilnaa an thil ziahte belchiang (verify)a, CA hnena report pe leh tura CA-in a thawn tur leh, SP atanga chung agencies dilna te rem tihpuina/lo hnial lohna (NoC), thu neituin a neih a ngaihna te chu a dan ti tha lehzualtu a ni ngei mai. He dan comment hi ka tum a ni ber lova, duh tawk mai ila. A tawp nan, he dan hi a hmang tura ngaih chinte chuan thu awih takin zawm sela kan za atan a himin a tha a ni. Thalaite ei zawnna leh a kaihhnawih buaipuitu ber deptt tih takah he danah hian LESD& E Department pawimawhna a lang ve a, a tha khawp mai; chu chu–Dilnaa Labour Lisence, Employees State Insurance Dan leh Emplyees Provident Act, 1952 hnuaia registration an nei ngei tih hriat theihna thil tel a ngai te hi a ni. Hetiang hi kan telh a nih chuan, Mizorama la cheng nghet lotena awlsam taka hetiang eizawnna hna (agency business) an tih theih loh nan private placement agency nih tumte dilnaah hian Employment Index Card thil tel tulna hi telh ve law law chi a ni ang. Tin, he dana Rule 2, ‘definition’ awmnaah hian ‘Controlling Authority’ sawi fiahna chuang ve bawk se, he dan hi a kimchang lehzual ^wm e.