Columbia-a naupang pali Amazon ram ngaw pilrila thlawhna tlaa damchhuaka ni 40 chuang zet ram hnuai ngaw chhaha tangkhanga awm te chu him taka chhanchhuahin an awm a.
Heng naupangte hi unau vek niin a upa ber chu kum 13 a ni a, kum kua, kum nga leh kum khat ten an zui a. Hmuh an nih hian an chau hle tawh a, mahse, chhungte an hmuh avangin an hlim hle a ni, tiin an pu Fidencio Valencia chuan a sawi.
Naupang palite hi kar kalta Zirtawpni khan thla khat chuang an chin hriat loha an awm hnuah sipai leh tualchung mi tena an zawn hnuah hmuh an ni a. 1 May khan an chuanna thlawhna chu tlain an nu ber leh pilot pahnihin nunna an chan a ni.
Naupang zual pahnih kum khata upa nausen leh kum nga mi chuan ram ngawah an piancham an hmang a, upa ber kum 13-a upa Lesly kaihhruaina hnuaiah hun harsa tak an paltlang thei a ni.
An vai hian indigenous Huitoto mite vek niin rul, ramsa hlauhawm leh thosi karah dam khawchhuak theiin theirah hmangin an intungnung hram hram a ni.
-- Advertisement --
‘Ram hnuai naupang’
Chutianga harsatna tawp an tawh pawha dam chhuak thei tura kaihhruai naupang an awm a nih chuan Mucutuy family te ang hi an ni mai tia sawi a ni a.
Huitoto mite chuan sa pel, sangha man te chu naupang tê an nih lai atanga an zir a ni tiin an pu Fidencio Valencia chuan a sawi a. A upa pahnih Lesly leh Soleiny te chu ram ngawa tal tura theihna nei tawh tiin a sawi a.
Naupangte ni Damarys Mucutuy chuan Colombian media te hnenah naupangte chu ‘survival game’ khela seilian tiin a sawi a. Kum 13-a upa Lesly chuan ‘Ram ngawah thei tur nei tam tak awm karah a eng nge eia him a hre der tawh a. Nausen enkawl dan tur pawh a thiam tawh sa a ni’ tiin a sawi.
Thlawhna tlaa an buai hnuah Lesly chuan thing tang la khawmin a sam tawnna ang te hmangin tawmhulna a siam a. Thlawhna Cessna 206 thla atangin flour chi khat Farina a chhar bawk a.
Naupangte hian he flour hi an ring char char a, an ei zawh hnuah thingrah an ei leh tiin chhanchhuahna lama tel indigenous leader Edwin paki chuan a sawi.
“Thei chikhat sap thei nena inang deuh avichure a awm a” tia sawiin, “Avichure kung hi zawngin an thlawhna tlakna atangin kilometre khat te an kal thin a ni,” tiin a sawi.
Astrid Cáceres, head of the Colombian Institute of Family Welfare chuan harsatna an tawh hun chu ‘ram ngaw ei tur tam lai tak’ tia sawiin thei ei tur tam vanglai a ni a ti a.
Tichung chuan ngaw pik ta na chu hlauhawm a tam hle thung a, indigenous expert Alex Rufino chuan naupangte chu ramngaw thim chhah mup mai thing lian em em ngir khupnaah an awm a ni, a ti a. Thing hnah thenkhat naupang tena tui an thlitfim theihna tur pawh a awm a ti a.
“He ram ngaw hi la daidarh loh a ni a. A chhehvel khua a te si a, chu pawh tuipui kamah ram ngaw bul lova din a ni,” tiin a sawi.
Ramsa hlauhawm tak te bakah naupangte chuan ruahpui vanawn an dodai bawk a. |um khat chu wild dog rual ten beiin mahse an inveng thei tiin Colombia president Petro chuan a sawi.
Rufino chuan kum 13-a upa indigenous community a seilian chuan chutiang environment-a dam khawchhuak tur chuan theihna leh thiamna a nei tawh hrim hrim tiin a sawi a.
John Moreno, leader of Guanano group, Vaupes chuan naupang te chu an pi indigenous leader zahkai takin a enkawl an ni a, community a an zir te leh an thlahtutena dam khawchhuahna atana pawimawh an neih te chu an zir thiam hman a ni a ti.
Sorkar pawhin naupang te chhanchhuah tum hian theihpalingkawhin hma a la a. Spanish leh Huitoto tawng te hmangin thlawhna atangin leaflet 10,000 chuang thlak a ni a, chutah chuan dam khawchhuah dan tur te ziak tarlan a ni a. Helicopter hmangin an pi aw ngei hmangin naupang te chu zawn mek an nih thu te aupui dum dum a ni bawk.
Naupangte hi sipai ten hmu zuiin hmuh an nih lai hian sipai 150 atanga 200 vel niin local indigenous group te nena thawkho an ni a, an vaiin 300 km sq vel an tuam a ni.
Kar kalta Zirtawpni khan hmuh an ni ta a, specialist rescue dog-in a hmu hmasa ber a. Naupang zinga upa ber Lesly chuan a nau nausen chu lo pawmin, “Ka ril a tam” tih a sawi hmasa ber tiin Colombia RTVC te chuan an tarlang a. Mipa naupang lo mu hahdam chuan din pahin, “Ka nu a thi,” tiin a sawi bawk.
A hnua an hriat leh danin an nu ber chu thlawhna tlak hnuah ni li lai a dam zui an ti a. “A thih hmain nu ber chuan a fate chu heta tang hian kal sawn r’u a ti” tiin naupangte pa Manuel Ranoque chuan a sawi.
Heng naupangte hi Cessna 206 aircraft-in an nu hovin Aracuara, Amazon province atanga San Jose del Guaviare pana an thlawh laiin thlawhna engine chiang lo vangin an tla a.
Thlawhna tlakna hmunah hian puitling pathum te nu ber leh pilot pahnih te ruang chu hmuh niin naupangte hi chuan dam khawchhuahna zawngin ram ngaw chu chhuahsan tumin an kal ta a ni.
May thla khan rescuer te chuan naupang tena tui in na bottle, sakawrbakcheh, hair tie leh makeshift shelter an hnutchhiah te chu an hmu a, an hniak a awm bawk a. Hei vang hian an la damah ngaiin keite, rul leh ramsa hlauhawm tak tak awmnaah hmuh tumin an zawng zui ta a ni.
Ram ngaw pik leh chhah tak a nih avangin awlsam taka hmuh mai theih an ni lo va, naupang te lahin an awmna an sawn ve zel bawk avangin an hmu mai thei lo a ni.