Combat sports ho lenna tur Centre of Excellence din tum

Ministry of DoNER hnuaiah ‘Boxing Centre of Excellence’ din tum mek a ni a, combat sports huangchhung ami chu hetah hian leng deuh vek turah an ngai tih Sports minister Lalnghinglova Hmar chuan a sawi.
Kumin June 5-a Bangkok Thailand-a neih One Championship Friday Night Fight-a chakna chang leh a aia hlu zawk contract hlawhchhuaktu Nazareth Lalthazuala lawmpuina chu Sports & Youth Services minister hian Nilaini khan a buatsaih a. A hlawhtlinna chuan mawhphurna lian tak a keng tel tih sawiin, “Mizo naupangte fuihtu leh tiphurtu tur a ni a. Tunah chuan ‘professional’ i nih tawh avangin i kutah mawhphurhna leh chona lian zawk hmachhawn tur a awm a ni,” a ti. World champion ni thei turin tun aia nasa zawka tan la turin a fuih bawk.
India ramin 2036-ah Olympic thlen tumin hma a la mek a, Zofate pawh Olympic-a kan tel ngei theihna turin nasa takin sawrkarin hma a la mek tih a sawi. Mizo theihna lam hawi combat sport an thlur bing deuh a, chumi atan chuan Ministry of DoNER-a North East Special Infrastructure Development Scheme – Other than Roads Infrastructure (NESIDS – ORTRI) atangin Rs. 38,39, 94,251.47 sengin Aizawlah Boxing Center of Excellence an din dawn a. Boxing chauh ni loin combat sports huang ami leng deuh vek turah an ngai tih a sawi a ni.
Nazareth Lalthazuala hi Phuaibuang khaw chhuak niin tunah Zemabawk East-ah a cheng a, a professional record-ah vawi 8 chak tawhin vawikhat mah a la tlawm lo a ni.