Compensation lak tum vangin revenue officer-in pass tibuai – Pangkhua VC & NGOs
Compensation lak tum vangin
revenue officer-in pass tibuai
– Pangkhua VC & NGOs
An khaw paltlang tur Border Roads Organisation kawngpui laih tumah compensation lak duh vangin revenue officer leh a thawhpuiten mi ram pass an tihbuai sak niin Pangkhua khawtlang hruaitute chuan an sawi a. Ram pass an siam thar ho chu cancel a nih loh chuan survey neih an remti dawn lo tih an sawi.
Lawngtlai district-a Pangkhua Village Council & All NGO thuchhuak chuan, Thingsai -Bualpui- Saisih- Pangkhua- Sangau (TBSPS) Road, km. 7.800 – 29.180, an khaw ram chhung bik laih turah he kawng aligment-in a paltlang chhunga village council leh NGO-te hriatpuina tel loin Lai Autonomous District Council-a revenue officer Sangau leh a staff-te chuan compensation beisei vangin ram pass tam tham tak an insiam tih an sawi.
He alignment-in a paltlang chhunga ram nei mi thenkhat pass renew tura tih niin, renew tura ram neituten pawisa pea office an dawr laiin, chhuanlam siama renew sak duh loin pawisa pawh pek kir an ni a. Hei hi remchanga lain pass thi tawh anga cancel sakin, mimal ram chhungah pass thar a siam tih ama tawngka atangin hriat a ni a, ram neitu dik tak hnenah ram hi pek let vek an phut tih an sawi a ni.
‘TBSPS Road laih tur hi aligment avanga rei tak a thuanawp tawh lai leh, BRO-in compensation a tam an hlauhthawn avanga kum tam tak harsatna kan tawh lai a, Pangkhua mi ni lo, LADC Revenue department-a thawk leh an laina hnaite ram pek an ni hi pawi kan tiin, ram hmasawnna tih thuanawp tumnaah kan ngai,’ a ti.
Compensation beisei avanga kum 2023- 2025 chhunga Revenue department-in ram pass an siam thar zawng zawng cancel an phut tih sawiin, heng an thilphut hi tihhlawhtlin a nih loh a, mimal ram cancel a nih loa, mimal ram cancel sakten an ram ngai ang an neih let leh hma chuan June 25 atanga July 3 chhunga Lawngtlai district bawrhsap pisa in preliminary survey neih a tum chu an remti lo tih an sawi.
He kawng hi a hmalama laih a nih theihna tur leh an thil phut a hlawhtlin theihnan hma laksak turin thuneitute an ngen tih an sawi bawk.